Hari mu mwaka wa 2009, ubwo ministri Kamanzi Stanislas, yasuraga ibi birombe biri mu karere ka Ngororero bikaba bihurirwaho n’abaturage bo mu turere twa Rutsiro na Ngororero, ubu akaba ashima ko aho yasanze hadateye amashyamba ubu bayahateye, ariko asaba abaturage kwirinda kuyangiza bayaragiramo amatungo yabo kuko bituma adakura kandi yaratwaye igihugu amafaranga menshi. Ku bijyanye n’imirimo y’ubucukuzi bw’amabuye y’agaciro bukorerwa ku masoko y’umugezi wa Sebeya, Ministri Kamanzi yababajwe n’uko ibyo yabasabye gukosora icyo gihe kugeza ubu batabyitayeho, ubu hakaba hari abacukura muri uwo mugezi, abacukura mu migezi 8 isuka amazi muri Sebeya ; abayobya amazi yawo ; abasukamo imyanda ; abarimbura amashyamba ; abacukura batarabihererwa uburenganzira n’ibindi. Ministri Kamanzi, ngo ntiyishimiye kuba inama bagiriwe zitarashyizwe mu bikorwa.