Indyo yuzuye ni umuti urambye w’ubuzima bwiza

Uyu munsin tariki ya 29 Werurwe 2021 mu karere ka Rutsiro hashojwe icyumweru cyahariwe imirire myiza, isuku n’isukura.

Ku rwego rw’Akarere, iki gikorwa cyabereye mu murenge wa Manihira ku kigo Nderabuzima cya Rutsiro mu kagari ka Muyira, kiyoborwa n’Umuyobozi w’Akarere Wungirije Ushinzwe Imibereho Myiza y’Abaturage Madamu Musabyemaria Marie Chantal. Iki gikorwa kitabiriwe n’abajyanama b’ubuzima hamwe n’ababyeyi bafite abana bagaragaraho ikibazo cy’imirire mibi n’abagikize.

Madamu Musabyemariya yagaragarije abitabiriye uyu muhango ibikorwa byakozwe muri iki gihe kingana n’iminsi 12 iki cyumweru kimaze.

Ibikorwa byari biteganyijwe

ü  Gukangurira imiryango byumwihariko irwaje imirire mibi akamaro k’umurima w’igikoni no kuwitaho

ü  Gukangurira imiryango, akamaro ko korora amatungo magufi

ü  Gukangurira ababyeyi bafite abana bari munsi y’imyaka itanu kwitabira gahunda y’igikoni cy’umudugudu

ü  Gukangurira ababyeyi gahunda y’isuku n’isukura n’ubuziranenge bw’ibiribwa

ü  Gushishikariza ababyeyi kugaburira abana indyo ikungahaye ku ntungamubiri zikomoka kumatungo, ku mbuto no kumboga( indyo yuzuye)

ü  Gushishikariza ababyeyi kwitabira gahunda y’igo mbonezamikurire

ü  Gukangurira ababyeyi gahunda yo kuboneza urubyaro

ü  Gukangurira abagabo uruhare rwabo mu guteza imbere imirire myiza mu muryango

Madamu Musabyemariya yanagaragaje kandi umusaruro wagezweho mu gusoza iki cyumweru.

Umusaruro wavuye mu cyumweru cyahariwe imirire myiza, isuku n’isukura

Icyumweru cy’imirire myiza, isuku n’isukura no guteza imbere Ingo Mbonezamikurire y’abana bato cyakozwe  mu midugudu yose hibandwa kubikorwa bikurikira:

§  Icyumweru cyatangirijwe ku mugaragaro mu murenge wa Kivumu

§  Hakowe inama za Komite yo kurwanya imirire mibi ku nzego zose ( SPEM, CPEM, mutugari 62

§  Hubatswe imirima y’igikoni  ku miryango 178/220 yarirwaje imirire mibi

§  Hateguwe kandi hanigishwa  uburyo bategura indyo yuzuye biciye mu gikoni cy’umudugudu aho ibikoni 483 byateguye indyo yuzuye

§   Hatanzwe Inyigisho zitandukanye ku mirire myiza, isuku n’isukura, imikorere ya ECD, ubuziranange bw’ibiribwa, akamaro k’impfashabere, akamaro ka Ongera intungamubiri, shisha kibondo, akamaro k’umurima w’igikoni mu kwihaza mubiribwa, akamaro ko kurya ibiryo bituruka ku matungo n’imboga gukangurira ababyeyi gahunda yo kuboneza urubyaro no gutanga serivisi kubayikeneye

§  Hasuwe Ingo mbonezamikurire murizo 310 mu rwego rwo kureba imikorere yazo

§  hakozwe igikoni cy’iminsi 12 ku bana bafite imirire mibi bashyirwa ahantu hamwe bitabwaho by’umwihariko aho 180/220 bakize imirire mibi

§  hatanzwe amagi ku bana bafite imirire mibi,Amata n’ibindi bibafasha mu mirire iboneye

§  hatanzwe ibikoresho birimo imikeka kuri ECD 142

Mu gusoza, Madamu Musabyemariya yibukije abitabiriye akamaro ko guha umwana indyo yuzuye kandi ifite isuku. Yagize ati: “Indyo yuzuye kandi ifite isuku ni urukingo rw’indwara nyinshi ziterwa n’umwanda. Ni umusemburo utuma umwana akura neza mu gihagararo, mu bwenge no mu mbamutima.“