Skip to main content Skip to page footer
Urubuga rwemewe rwa Leta y’u Rwanda
Coat of arms of RwandaAkarere ka Rutsiro

Rutsiro: Abayobozi bakoze inama ku gukumira inda ziterwa abangavu.

2 September 2026

Ku bufatanye na APESEK-GIRIMPUHWE na Imbuto Foundation, kuri Hotel Ubumwe mu Karere ka Rutsiro habereye inama yo gukangurira abayobozi b’inzego z’ibanze, abayobozi b’abaturage n’ab’amadini, abahagarariye abagore n’urubyiruko, ku kibazo cy’inda ziterwa abangavu no gushakira hamwe ingamba zo kugikumira.

 

Inama yayobowe na Madamu Umuganwa Marie Chantal, Umuyobozi w’Akarere Wungirije Ushinzwe Imibereho myiza Madamu Umuganwa Marie Chantal ari kumwe na Bwana Nyandwi Emmanuel, Umuyobozi Mukuru wa APESEK-GIRIMPUWE.

 

Iyi nama yabaye mu rwego rwo gushyira mu bikorwa Umushinga wa BAHO NEZA-SRH, ugamije kongera ubumenyi n’ubukangurambaga ku bijyanye n’Ubuzima bw’Imyororokere bw’Abangavu n’Urubyiruko ndetse n’uburyo bwo kuringaniza (ASRH-FP), no kumenyekanisha uburyo bwo kubona izi serivisi.

 

Abitabiriye inama bagaragaje ko gukumira inda ziterwa abangavu bisaba ubufatanye bw’inzego zose, by’umwihariko uruhare rw’ababyeyi, abarimu, abayobozi b’amadini n’abayobozi b’inzego z’ibanze. Hashimangiwe ko ababyeyi bombi bakwiye kurushaho kwita ku bana b’abakobwa n’abahungu, bakaganira na bo ku buzima bw’imyororokere kandi bakabafasha kugira imyitwarire iboneye.

 

Hagaragajwe kandi ko mu mashuri hakwiye gukomeza gushyirwamo imbaraga mu matsinda y’urubyiruko agamije kubafasha gusobanukirwa ubuzima bw’imyororokere, ndetse n’abarimu bagategura amasomo afasha abanyeshuri gusobanukirwa imibereho, imyitwarire n’ubuzima bw’imyororokere.

 

Mu butumwa bwatanzwe, hasabwe ko kurwanya inda ziterwa abangavu bitagomba kugarukira ku biganiro gusa, ahubwo hakwiye gushyirwa imbaraga mu bikorwa bifatika. Umuyobozi w’Akarere Wungirije Ushinzwe Imibereho myiza yagize ati:

“Twese hamwe tujyane abana ku ishuri. Umwanzi dufite uyu munsi ni uguta ishuri! Ni ukutiga. Tugerageze abana b’abakobwa bige kandi bigire umusaruro!”

Hanasabwe abarezi n’ababyeyi kurushaho kwegera abana no gufatanya gukemura ibibazo bahura na byo, kugira ngo abana b’abakobwa n’abahungu babashe gukomeza amashuri no kugira ahazaza heza.

Back