Rutsiro: Abikorera barasabwa kugira uruhare rufatika mu iterambere ry’Akarere

Ku wa 25 Nzeri 2026, mu Karere ka Rutsiro habereye inama y’Urugaga rw’Abikorera (PSF), yabereye kuri Hotel Ubumwe, ihuza abayobozi b’Urugaga rw’Abikorera n’abanyamuryango barwo, baganira ku ruhare rw’abikorera mu iterambere ry’Akarere. Inama yatangijwe kandi iyoborwa n’Umuyobozi w’Akarere ka Rutsiro, Madamu Kayitesi Dative.

Muri iyi nama hatanzwe ikiganiro gisobanura akamaro ko kuba umunyamuryango wa PSF, hanaganirwa ku Gishushanyo Mbonera cy’Imikoreshereze y’Ubutaka n’uruhare rw’Abikorera mu kubaka Akarere ka Rutsiro. Abitabiriye kandi bagize umwanya wo kungurana ibitekerezo ku buryo abikorera barushaho kugira uruhare mu bikorwa by’iterambere ry’Akarere.

Umuyobozi w’Akarere ka Rutsiro, Madamu Kayitesi Dative, yasabye abikorera gukomeza gukorana neza n’ubuyobozi bw’Akarere, bakagira uruhare rufatika mu guteza imbere ubukungu bw’Akarere no guteza imbere imibereho y’abaturage. Yagaragaje ko ubufatanye hagati y’inzego za Leta n’abikorera ari ingenzi mu guteza imbere ishoramari, guteza imbere imirimo no gukoresha neza amahirwe ahari mu Karere.

Muri gahunda y’inama kandi hatanzwe ikiganiro ku musanzu wa PSF, hanaganirwa ku ikusanywa ry’umusanzu mu Ntara y’Iburengerazuba ndetse n’Ikigega cyo Kwivuza cya PSF (PSF Health Scheme). Abitabiriye bahawe umwanya wo gutanga ibitekerezo no kubaza ibibazo ku ngingo zaganiriweho.

Mu gusoza, Madamu Kayitesi Dative yashimiye abitabiriye inama ku ruhare rwabo mu biganiro, abasaba gukomeza gukorera hamwe no gushyira mu bikorwa ibyemezo n’ibitekerezo byagaragajwe, hagamijwe gukomeza guteza imbere Akarere ka Rutsiro.