uyu munsi mu karere ka Rutsiro, ku biro byako, habaye inama igamaje gukangurira ababyeyi kugira uruhare mu myigire y'abana babo babagaburira ku ishuri. Iyi nama yitabiriwe n'abashyitsi batandukanye harimo umujyanama wa Komite Nyobozi y'Akarere ka Rutsiro Uwihanganye Jean Baptiste, Intumwa ya Minisiteri y'Uburezi, Karenzi Azade, n'intumwa y'Umuryango Mpuzamahanga Ushinzwe ibiribwa ku isi(WFP) Christophe Bucyanayandi ndetse n'abandi batandukanye baturutse mu mirenge isanzwe ikorerwamo iyi gahunda. Iyi gahunda yo kugaburira abana ku ishuri (School Feeding Program) ikaba ikorerwa mu mirenge itatu y'Akarere ka Rutsiro kugeza ubu ari yo Manihira, Ruhango na Kivumu. Abitabiriye inama bagaragaje ko bashimishijwe ma gahunda yo gufasha abanyeshuri kubona amafunguro ku bigo by'amashuri bigaho ndetse bagira n'ingamba bafata zituma ababyeyi bagira uruhare rufatika kugira ngo gahunda yo kugaburira abanyeshuri irambe ndetse izagezwe no mu yindi mirenge itarageramo. Abitabiriye inama bagaragaje ko kugira ngo abaturage babashe kugira uruhare muri iyi gahunda ari uko iyi gahunda yakangurirwa abaturage mu nama zose abaturage bahuriramo.

bagaragaje kandi ko kugirango ibikorwa by'iyi gahunda bikurikiranwe neza habaho itsinda rihuriweho n'urwego rw'umurenge, Akagari n'ababyeyi bagize komite nyobozi bakagira gahunda yo kwigiranaho, ikigo kimwe kikigira ku kindi ibyo gikora neza.

Na none kandi bagaragaje ko guhindura imyumvire y'ababyeyi binyuze mu nama zitandukanye harimo inteko z'abaturage ari ingenzi ndetse n'ababyeyi baba bigize ntibindeba bakabimenyeshwa hakiri kare n'urutonde rwabo rukaba ruzwi.


Abitabirye inama kandi bemeje ko gushyiraho ubugenzuzi buhoraho bukozwe n'ababyeyi ubwabo bwagira icyo bwongera ku migendekere myiza ya gahunda yo kugaburira abana ku ishuri. Ikindi cyagrutsweho ni uko abanyamadini bakangurirwa kugira urahare muri gahunda yo kugaburira abana ku ishuri bafasha mu bukanguramabaga bw'abaturage.