Kuri uyu wa Gatatu tariki ya 07 Gicurasi 2025, abadepite babarizwa muri Komisiyo y’Imibereho Myiza batangiye uruzinduko rw’akazi rw’iminsi 2. Uru ruzinduko rwitabiriwe n’inzego zitandukanye zifite aho zihurira n’ibikorwa bigamije kurwanya igwingira n’imirire mibi mu Karere aho babanje mu nama yarebeye hamwe ibikwiriye gukorwa kugira ngo igwingira riranduke burundu mu Karere. Muri iyi nama hagaragajwe ishusho rusange y’uburyo Akarere gahagaze mu bikorwa byo kurwanya igwingira n’imirire mibi.

 Iyi nama yahuje itsinda ry’abadepite rigizwe na Nyakubahwa Uwamariya Veneranda, ari na we muyobozi w’itsinda, na Nyakubahwa Mukarusagara Eliane,  Umuyobozi w’Akarere Wungirije ushinze iterambere ry’ubukungu, Bwana Uwizeyimana Emmanuel, Umuyobozi w’Akarere Wungirije ushinzwe imibereho myiza y’abaturage, Madamu Umuganwa Marie Chantal, abahagarariye inzego z’umutekano mu Karere, abahagarariye Inama Njyanama y’Akarere, abahagarariye inzego z’abagore, urubyiruko n’abafite ubumuga, abayobozi b'Imirenge, abakozi b'Akarere, Umuyobozi w’Ihuriro ry’Abafatanyabikorwa b’Akarere n’uhagarariye Cartas Rwanda.

Umuyobozi w'Akarere Wungirije ushinzwe iterambere ry'ubukungu Bwana Uwizeyimana Emmanuel, yahaye ikaze abitabiriye iyi nama. Yagize ati: “dukwiye kurenga kuvuga ko dufite agashya ahubwo bigakemura ikibazo dufite. Dukwiriye gukora ubukangurambaga, kunga imbaraga mu byo dukora turwanya imirire mibi n’igwingira, abana bacu bagakura neza; ni bo Rwanda rw'ejo. Turi mu rugamba rwo gukemura ikibazo cy'imirire mibi n'igwingira mu buryo burambye.”

Umuyobozi w’Akarere Wungirije ushinzwe imibereho myiza y’abaturage Madamu Umuganwa Marie Chantal yagaragaje ishusho rusange igaragaza imirire mibi n'igwingira mu Karere. Yagaragaje ko Akarere ka Rutsiro gafite abana bari mu mirire mibi aho yagize ati: “duhura  n’imbogamizi zitandukanye harimo ubukene mu miryango, abakoresha inkunga nabi, imyumvire, amakimbirane no kutaboneza urubyaro.”  

Yakomeje agaragaza ingamba zafashwe kugirango harandurwe imirire mibi n’igwingira mu bana bato ati: “akarima k’igikoni kuri buri rugo, amarerero muri buri mudugudu, ubworozi bw'amatungo magufi, guca amakimbirane, ubukangurambaga mu bice bitandukanye hagamijwe gukemura amacakubiri n’amatsinda yo kubitsa no kugurizanya nk’inzira yo kwivana mu bukene.”

Mu ijambo ry’umushyitsi mukuru Nyakubahwa Madamu Uwamariya Veneranda, yagize ati: “dukwiriye kwiyemeza kurushaho tugakorera ku ntego zihamye. dukwiriye guhera ku muryango nyir’izina kugira ngo tubashe kurandura imirire mibi n'igwingira buri mubyeyi wese akabigiramo uruhare. Hakenewe ubufatanye n'inzego zibishinzwe mu kurwanya imirire mibi n'igwingwira n’ubukangurambaga bugamije gukumira amakimbirane mu muryango.”

Nyuma y’inama, abadepite bakomeje uruzinduko rwabo bari kumwe n’ubuyobozi bw’Akarere basura amarerero y’abana bato, ababyeyi bafite abana bahoze mu kibazo cy’imirire mibi bakaba barayivuyemo bafashijwe na Leta mu Murenge wa Kivumu na Rusebeya. Basuye kandi ibigo Nderabuzima bya Kivumu mu murenge wa Kivumu na Kabona mu murenge wa Rusebeya.