Uyu munsi tari ya 25 Kamena 2919, itsinda ry'abadepite babarizwa muri Komisiyo y'Ubukungu n'ubucuruzi, basuye akarere ka Rutsiro mu rwego rwo kureba uko ibikorwa by'amashanyarazi bihagaze mu karere ka Rutsiro.

Aba badepite bari bayobowe na Hon. Munyangeyo Théogène ni Hon.Mutesi Anitha, Hon. Habiyaremye Pierre Céléstin na Hon. Rwaka claver bakiriwe n'umuyobozi w'Akarere Ayinkamiye Emérence ari kumwe n'Umuyobozi w'Akarere Wungirije Ushinzwe Iterambere ry'Ubukungu Gakuru Munyakazi Innocent.

Nk'uko yabisonauye Hon. Théogène yavuze ko impamvu nyamukuru y'uru ruzinduko ari ukumenya uko ingufu z'amashanyarazi zihagaze mu karere ka Rutsiro cyane ko akamaro k'amashanyarazi kigaragaragaza mu buzima bwa buri munsi bw'umuturage.

Yagize ati: "amashanyarazi yihutisha iterambere ry'umuturage. Bityo tugomba gukora ibishoboka byose tugaha umutarage amashanyarazi atuma agera kuri iryo terambere. Dukwiye kurenga ku kigero cy'uko umuturage agomba gucanirwa gusa kandi amashanyarazi ntakindi wayakoresha."

Ariko izi mpungenge akaba yazimazwe n'ubuyobozi bw'aakarere bwagaragaje ko na bwo burajwe inshinga no guha abaturage amashanyarazi abagirira akamaro gafatika aho bwatangaje ko ubu ahari ibyuma bihindura ingufu z'amashanyarazi (transformers) bya MONOFAZE birimo kugenda bihindurwa hagashyirwaho ibya TRIFAZE hakurikijwe uko abaturage bayakeneye.

Muri iyi nama kandi hagarutswe by'umwihariko ku murenge wa Nyabirasi udafite umuriro kugeza magingo aya aho Umuyobozi w'Akarere yatangaje ko na wo uzaba ufite amashanyarazi bitarenze umwaka wa 2019/2020.

Ku birebana n'ibibazo by'abaturage batahawe ingurane z'imitungo yabo igihe hakorwaga imiyoboro itandukanye, abadepite bakaba bijeje ubuvugizi kandi ko n'akarere gakomeje kubikurikiranira hafi kugira ngo aba baturage bahabwe ingurane.

Kugeza ubu, akarere ka Rutsiro kakaba gafite ingomero z'amashanyarazi ahantu hanyuranye (Nkora, Gashashi, Cyimbiri na Murunda) zitanga hejuru gato ya MGW 1 mu gihe ingufu z'amashanyarazi zikorehswa mu karere hose ari hejuru ya MGW 5. Izi ngomero zose zicungwa n'abikorera n'akarere gateganya kongera umubare wazo.

Abaturage bacaniwe mu karere ka Rutsiro bose hamwe ni 37%.

Nyuma y'inama abadepite bakomeje bajya gusura ibikorwa by'inganda kuri terrain ku rugomero rwa Murunda.