Uyu munsi ku wa 30 Werurwe 2022 mu cyumba cy’inama cy’akarere ka Rutsiro habereye inama yo gusoza uruzinduko rw’akazi rw’abagize inteko ishinga amategeko bayobowe na Hon. NYIRAHIRWA Venerande.

Aba bashyitsi bakiriwe n’Umuyobozi w’Akarere Madamu MUREKATETE Triphose ari kumwe n’Umuyobozi w’Akarere Wungirije Ushinzwe Imibereho Myiza y’abaturage.

Iyi nama yitabiriwe n’abahagarariye inzego z’umutekano ku rwego rw’Akarere, abayobozi ba komisiyo z’inama njyanama y’akarere, abayobozi b’amashami ku karere, abayobozi b’ibigo bitandukanye bikorera mu karere harimo abashinzwe amazi, amashanyarazi, banki n’ibindi n’abanyamabaganga nshingwabikorwa b’imirenge.

Muri uru ruzinduko rw’intumwa za rubanda rumaze iminsi 16, abadepite basuye imirenge yose 13 igize akarere ka Rutsiro baganira n’abayobozi b’inzego zitandukanye mu mirenge ku bibazo bitandukanye abaturage bafite.

Uru ruzinduko rukaba rwari rugamije kureba no kumenya neza imiterere y’ibikorwa by’iterambere mu karere nyuma yuko icyorezo cya Covid 19 gishegeshe ubukungu ku nzego zitandukanye.

Hon. NYIRAHIRWA, mu izina ry’itsinda yari ayoboye, akaba yagarutse ku byo babonye mu ruzinduko rwabo.

Yashimye ko akarere gafite amahirwe atandukanye yatuma gatera imbere ku buryo bwihuse harimo kuba gafite umuhanda wa Kivu Belt, kuba gakora kuri Pariki ya Gishwati-Mukura bigaha amahirwe yo gukurura abakerarugendo n’ibindi. Ariko na none hari ibyo bagaragaje nk’imbogamizi n’ibibazo byatuma iterambere ritihuta agira ibyo atangaho inama.

Ku bijyanye n’imiyoborere myiza, Hon. NYIRAHIRWA yasabye ubuyobozi kwimakaza ihame ry’imiyoborere myiza begera abaturage, bakabatega amatwi kandi bagakemura ibibazo byabo.

Yagarutse ku kibazo cy’uburezi budafite ireme ritatuma iterambere ry’akarere rigira aho rigera. Aha ni ho Hon. NYIRAHIRWA yasabye ko harebwa ibishoboka byose ku buryo ireme ry’uburezi rizamuka mu karere, bityo hakaba hari ikizere ko uRwanda rw’ejo ruzaba rufite abaturage bafite ubumenyi buhagije bwo kuruteza imbere.

 Abadepite bagaragaje kandi ikibazo cy’ibikorwaremezo bikiri bike mu karere cyane ibyerekeranye n’imihanda itameze neza ituma ubuhahirane n’imigenderanire bidakorwa uko bikwiye. Bagaragaje ko iki cyibazo gikoma mu nkokora iterambere ry’ubukerrarugendo mu gihe akarere ka Rutsiro kabereye ubukererugendo.

Abadepite basabye kandi abakozi n’ubuuyobozi muri rusange kongera ubunyangamugayo mu bikorerwa abaturage bityo ibyo bagenewe bakabibona uko byakagombye kandi ku gihe.

Mu kuganisha ku musozo, abadepite bagaragaje ikibazo cy’amakimbirane arangwa mu miryango nayo atuma abagize umuryango batagira aho bava n’aho bagera kubera amakimbirane. Kuri iyi ngingo, abadepite basabbye ubuyozi gukora ubukangurambaga ku baturage, bagakora ibishoboka byose mu kuyakumira imiryango ikabaho itekanye.

Umuyobozi w’Akarere, Madamu Murekatete Triphose akaba yijeje abadepite n’abaturage muri rusange ko Akarere kazashyira mu bikorwa inama bagiriwe kandi bagakora ubuvugizi ku bibazo akarere katakwikemurira na byo bikaya bikemuka mu gihe giteganywa n’amategeko.