Muri iki gitondo, Umuyobozi w’Akarere ka Rutsiro, ari kumwe n’abandi bayobozi n’abakozi b’Akarere batandukanye, yakiriye Itsinda ry’Abadepite rigizwe na MUZANA Alice ari na we uriyoboye na Uwiringiyima Philbert baje mu rwego rwo kureba uburyo serivisi zigamije guteza imbere imibereho myiza zishyikirizwa abaturage.

Aba badepite bakaba bari mujri gahunda y’Ihuriro ry’abagize inteko ishinga amategeko riharanira imibereho myiza y’abaturage n’iterambere yo gusura Uturere harebwa gahunda yavuzwe haruguru.

By’umuwihariko, uru ruzinduko rukaba rugamije  kumenya uburyo gahunda za guverinoma zigamije guteza imbere ubuzima bw’umubyeyi n’umwana no kugeza serivisi z’imyororokere ku rubyiruko zihangaze mu karere.

Ibi byose bikangenzurwa bihuzwa na gahunda za guverinoma zigamije kwita ku buzima bw’umwana n’umubeyi harimo kugabanya imfu z’abana n’ababyeyi bapfa babyara, kurwanya igwingira ry’abana bato mu gihe hasigaye imyaka ibiri ngo tugere mu mwaka wa 2024.

Kugeza ubu, nk’Uko Hon. MUZANA yabigarutseho, Ubushakashatsi bwakozwe mu mwaka wa 2020 bwagaragaje ko uRwanda rugifite ibibazo birimo kwiyongera kw’inda ziterwa abana bakiri bato, ndetse n’abakenera serivisi zo kuboneza urubyaro ntibazibone uko bikwiriye.

Abadepite bagize Itsinda bakaba bifuza kumenya impamvu zibitera mu rwego rwo kubikoraho ubuvugizi ku nzego zishinzwe gushyira mu bikorwa gahunda za Leta bigamije ko iterambere ry’imibereho myiza y’abaturage ryakwihuta.