Uyu munsi tariki ya 14 Gashyantare 2024, kuri Hotel Ibigabiro Rutsiro hateraniye inama y'inteko rusange y'abafatanyabikorwa b'Akarere ka Rutsiro iyobowe na Perezida wayo Bwana Uwiragiye Raymond. Usibye abafatanyabikorwa bayitabiriye, iyi nama yanitabiriwe n’abayobozi b’akarere bungirije bombi. Akarere ka Rutsiro gafite abafatanyabikorwa basaga 140.

Inteko rusange y'abafatanyabikorwa b'Akarere iterana inshuro 2 mu mwaka, 1 mu mezi atandatu.

Abitabiriye inama bagejejweho ibikorwa bitandukanye by'abafatanyabikorwa mu mwaka w’ingengo y’imari wa 2023-2024 biteganya gutwara ingengo y'imari isaga miliyali 10.

Umuyobozi w'Akarere Wungirije Ushinzwe Iterambere ry'Ubukungu Bwana Uwizeyimana yagaragarije abitabiriye inama uko imihigo y'Akarere 2023-2024 ihagaze hanaganirwa ku ruhare rwa buri mufatanyabikorwa mu kwesa imihigo.

Nyuma yo kungurana ibitekerezo ku ruhare rwa buri mufatanyabikorwa mu Iterambere n'imibereho myiza y'abaturage, ubuyobozi bw'Akarere n'abafatanyabikorwa biyemeje guhuza imbaraga mu gukemura ibibazo by'abaturage.

Abayobozi bijeje abafratanyabikorwa kuzashyira imbaraga mu gukurikirana no gusigasira ibyagezweho n’abafatanyabikorwa na bo basabwa kujya bagaragariza akarere ibyakozwe mbere yo gusoza imishinga itandukanye.