Itsinda ry'abagize Urubuga ngishwanama rw'Inararibonye z'u Rwanda, riyobowe na Hon. Marthe Mukamurenzi, rikaba ryarimo na Hon. Prof. Pierre Damien Habumuremyi, Hon. Francis Karemera na Hon. Anicet Kayigemana, ryasuye Akarere ka Rutsiro rigamije gusuzuma imikorere ya koperative n’uruhare agira mu iterambere ry’abanyamuryango. Iri tsinda ryakiriwe na Visi Meya ushinzwe Iterambere ry’Ubukungu, Bwana Uwizeyimana Emmanuel, watanze ishusho rusange y’iterambere rya koperative kuva yashyirwaho. Yagaragaje uruhare rw’Akarere mu kuyashyigikira, harimo no gufasha mu kubahiriza ibisabwa n’amategeko, anagaragaza imbogamizi zikigaragara mu mikorere yazo.

Akarere kagaragaje ingamba kari gukoresha zirimo gushishikariza abanyamuryango kwitabira inama za koperative, gutanga amahugurwa, kongera ubukangurambaga n’ubugenzuzi, ndetse no gukora ingendo zo gusura ibikorwa byayo. Icyakora, hagaragajwe imbogamizi zikomeye zirimo imicungire mibi y’umutungo, amakimbirane hagati y’abanyamuryango, no kudakoresha inama rusange nk’uko biteganywa n’amategeko. Hanagaragajwe ubumenyi buke ku mategeko agenga koperative ndetse no kudasaranganya inyungu mu buryo bungana. Byongeye kandi, raporo zidatangwa neza, kubura ingengo y’imari yo gukurikirana ibikorwa ku nzego zegerejwe abaturage, ubushobozi buke bwo kugenda ku bakozi bo ku rwego rw’imirenge, hamwe n’ibiza byibasira Akarere kenshi, bikomeje kudindiza iterambere rya koperative.

Hibanzwe by’umwihariko ku bibazo byugarije koperative zimwe n’zimwe, harimo CODECAM Gisiza yatangiye nk’itsinda ry’abahinzi b’inanasi ikaza kwagura ibikorwa igana mu gutunganya umusaruro. Nubwo yagiye ihabwa inkunga zitandukanye n’inguzanyo zirimo n’iyo mu kigega cya BDF, iyi koperative ntiyabashije gutangira neza ibikorwa byo gutunganya umusaruro ndetse no kwishyura inguzanyo kubera imbogamizi zitandukanye. Itsinda ryanasuye kandi koperative y’icyayi ya RUTEGROC ikorera mu Murenge wa Gihango, ikorera mu mirenge itandatu ikaba ifasha abahinzi barenga 2,000. Muri rusange, uru ruzinduko rwatanze ishusho ifatika n’inama zafasha kunoza imicungire ya koperative no kongera uruhare rwazo mu kuzamura imibereho y’abaturage mu Karere ka Rutsiro.