Uyu munsi tariki ya 9 Ugushyingo 2023, Abayobozi b'Akarere ka Rutsiro basuye abagororwa bakomoka mu karere ka Rutsiro bari mu Igororero rya Rubavu riherereye mu karere ka Rubavu, Umurenge wa Nyakiliba mu rwego rwo kubaganiriza no kubategura kugaruka mu buzima busanzwe.

Uru ruzinduko rw’aba bayobozi  rwo gusura abagororwa rwakozwe muri gahunda y’ukwezi kwahariwe kwimakaza ihame ry'ubumwe n'ubudaheranwa bw'Abanyarwanda.

Abayobozi basuye aba bagororwa bagizwe n'abanyamabanga Nshingwabikorwa b'imirenge n'abayobozi b'Inzego z'umutekano mu karere bayobowe n'Umuyobozi w'Agateganyo w'Akarere Bwana Mulindwa Prosper.

Bakigera ku Igororero, aba bayobozi bakiriwe n’Umuyobozi w’Igororero abaha umwanya baganira n’abagororwa 7785 bose bagororerwa muri iri gororero.

Mu kiganiro cye, Bwana Mulindwa yagarutse ku mateka mabi y’amacakubiri yaranze U Rwanda akarugeza kuri Jenoside yakorewe Abatutsi mu 1994.  Yabasabye kugororoka uko bikwiye bakumva ko indangagaciroya Ndi Umunyarwanda bakagira uruhare mu guhsyira mu bikorwa gahunda y’ubumwe n’ubudaheranwa by’abanyarwanda.

Bwana Mulindwa yakomeje agaragaza ko U Rwanda rugeze aheza hashimishije mu iterambere no mu bumwe n’ubudaheranwa bw’abanyarwanda: “uyu munsi buri wese atewe ishema n'ibyo U Rwanda rwagezeho. Dukomere ku Gihango cya Ndi Umunyarwanda, twiyumvemo ubunyarwanda, dusobanukirwe amateka y'U Rwanda no kwimakaza indangagaciro. Buri wese agire uruhare mu gusigasira ubumwe n'ubudaheranwa bw'Abanyarwanda.”

Nyuma yo kuganira na bo muri rusange, abayobozi bahuye n’abagororwa 1482 bakomoka mu karere ka Rutsiro by’umwihariko, hagamijwe kubatega amatwi no kumva ibibazo bitandukanye bafite no kubafasha kubikemura. Mu matsinda atandukanye, abanyamabanga nshingwabikorwa b'imirenge barimo bakiriye ibibazo byabo, abagororwa basaba kubibakemurira no kubakorera ubuvugizi.

Aganira n’aba bagororwa, Bwana Mulindwa yagize ati: "nta kibazo cyakemuka nyiracyo atakigizemo uruhare. Mwizere abayobozi banyu kandi na mwe mwumveko buri kibazo kiba gifite igisubizo ariko na mwe mugizemo uruhare."

Abagororwa bishimiyeko imiyoborere myiza imaze kuba ihame mu Rwanda gukeza n’abari mu igororero ubuyobozi bubatekerezaho basaba abayobozi gubakorera ubuvugizi ku bibazo bitandukanye baba bafite.

Bwana Mulindwa n’itsinda ry’abayobozi yari ayoboye, biyemeje kubakorera ubuvugizi uko bikwiye.