Uyu munsi tariki ya 28 Ugushyingo 2024, Umuyobozi w'Akarere Madamu Kayitesi Dative yakiriye itsinda ry'abambasaderi 7 bagize inama y'Ubutegetsi y'Umuryango wita ku biribwa (WFP Executive Board). Aba bashyitsi basuye Akarere mu rwego rwo kurebera hamwe impinduka imishinga iterwa inkunga binyuze muri WFP yagejeje ku baturage.

Uruzinduko rwabo mu karere, rwabanjirije ku kigo nderabuzima cya Kayove aho barebye ibikorwa bitandukanye bigamije kurwanya imirire mibi no gukumira igwingira ry'abana. Nyuma yo kumva ubuhamya bw'umubyeyi wari ufite umwana urwaye imirere mibi nyuma akayivamo, abashyitsi bashimye intambwe Akarere kateye mu guhangana n'ikibazo cy'imirire mibi aho mu bipimo byako kageze kuri 28% uvuye kuri 44%.

Nyuma yo gusura ikigo nderabuzima, abashyitsi basuye igishanga cya Bitenga cyatunganyijwe hagamijwe kunoza imikoresheze yacyo no kongera umusaruro. Hanasuwe n'inyubako yagenewe guhunikwamo umusaruro w'ibirayi no gutuburiramo imbuto yabyo.

Nyuma yo gutunganywa, iki gishanga gihingwamo inshuro 3 ku mwaka mu gihe cyari kimeze nk'aho nta mumaro cyari gifitiye benecyo mu bijyanye n'ubuhinzi.

Abashyitsi bishimiye impinduka uyu mushinga wagejeje ku baturage harimo no kuzamura Ubukungu bwabo, guteza imbere ihame ry'uburinganire n'ibindi.

Abashyitsi bifujeko ubuyobozi buzakomeza gukurikirana ibikorwa byagezweho bigafasha abaturage mu gihe kirekire.