Abasenateri Hon. NIYOMUGABO Cyprien na Hon. GAHAMANYI Bibiane bagiriye uruzinduko rw'Akazi mu Karere ka Rutsiro muri gahunda y'inteko ishinga amategeko umutwe wa Sena igamije kugenzura ibikorwa mu guteza imbere amavuriro y’ibanze. Uru ruzinduko rwabaye tariki ya 21 na 22 Mutarama 2023.

Uru ruzinduko rwakozwe mu rwego rwo kugenzura uburyo ihame ryo guteza imbere ubuzima rishyirwa mu bikorwa.

By’umwihariko, iyi gahunda yari igamije kugenzura uko amavuriro y’ibanze yegerejwe abaturage akora; kugenzura uburyo serivisi z’ubuvuzi zitangwa mu mavuriro y’ibanze no kumenya niba zifasha abaturage bayagana uko bikwiye; kugenzura uruhare rw’inzego za Leta, abaturage n’abafatanyabikorwa mu guteza imbere amavuriro y’ibanze; kumenya imbogamizi zigaragara mu guteza imbere amavuriro y’ibanze; no kumenya ingamba ziteganyijwe zo gukuraho izo mbogambizi.

Aba bashyitsi bakiriwe n'Umuyobozi w'Akarere Madamu Kayitesi Dative ari kumwe n'Umuyobozi Mukuru w'Ibitaro bya Murunda Bwana Nkunzimana Jean Pierre.

Uru ruzinduko rwaranzwe n'ibikorwa bitandukanye harimo gusura amavuriro y'ibanze, kuganira n'abaturage batandukanye no kugirana inama n'abayobozi batandukanye munrwego rw'ubuzima mu Karere.

Amavuriro yasuwe n'ivuriro ry'ibanze rya Maziba riherereye mu Kagari ka Maziba mu murenge wa Mushonyi n'ivuriro rya Buhoko mu murenge wa Kivumu riherereye mu Murenge wa Kivumu. Abasenateri bagenzuye serivisi zitangwa kuri aya mavuriro, imboganizi zihari n'uburyo zakemuka.

Nyuma yo gusura amavuriro, abasenateri baganiriye n'abaturage mu nteko y'abaturage bo mu Kagari ka Karambi mu murenge wa Kivumu. Abasenateri bagarutse ku mahame remezo agenga abanyarwanda ariko bibanda cyane ku ihame ryo guteza imbere ubuzima no kwegereza serivisi z'ubuvuzi abaturage.

Hamwe n'abayobozi, abaturage bagejeje ku basenateri ibyifuzo bitandukanye bifuzako byakongerwa mu mavuriro y'ibanze nyuma yo kungurana ibitekerezo no gushima ko begerejwe n'ubuvuzi.

Ibi bitekerezo n'imboganizi kandi ni na byo byaganiweho mu nama abasenateri bagiranye n'abayobozi bo mu rwego rw'ubuzima mu Karere. Abari mu nama bagaragarije abasenateri muri rusange imbogamizi zikigaragara mu mitangire ya serivisi z'ubuzima mu karere.

Muri zo havuzwe:

1. Abakozi bake ugereranyije n'abakenewe,
2. Ibitaro bimwe mu Karere
3. Ibikoresho by'ubuvuzi bikiri bike
4. Inyubako zishaje
5. N'izindi.