Abanyeshuri biga mu ishuri rikuru rya Gisirikari rya Nyakinama bashoje urugendoshuri rwabo rw’iminsi 2 mu karere ka Rutsiro.

Uru rugendoshuri abasirikare n’abapolisi bakaba barukora buri mwaka mu rwego  rw’ubushakashatsi kuri serivisi z'ubuzima n'uruhare zigira mu kubungabunga umutekano w'igihugu.

Ku munsi w’ejo tariki ya 14 Gashyantare 2023, ni bwo abagize itsinda bageze mu karere ka Rutsiro; bakirwa n’abayobozi b’Akarere baganira ku miterere ya serivisi z’ubuzima n’ibikorwa bitandukanye bigamije guteza imbere ubuzima mu karere muri rusange.

Ku munsi wa none tariki ya 15 Gashyantare 2023, abagize itsinda bari kumwe n’umuyobozi w’Akarere ka Rutsiro Madamu Murekate Triphose basuye ibitaro bya Murunda hagamijwe kureba uburyo serivisi zihabwa abagana ibitaro ndetse n’imbogmizi ibitaro byaba bihura na zo zishobora gutuma serivisi z’ubuzima zitagenda neza.

Nyuma yo kugaragarizwa imikorere y’ibitaro muri rusange, abagize itsinda bashimiye ubuyobozi bw’ibitaro n’ubw’Akarere muri rusange ku mikorere myiza bagaragariza ababagana.

Nyuma yo gusura ibitaro bya Murunda, abashyitsi bakomereje ku Kigo Nderabuzima cya Kayove giherereye mu Murenge wa Ruhango mu rwego rwo kumenya serivisi zitangirwa ku kigo nderabuzima.

Abagize iri tsinda bakomoka mu bihugu 6: Botswana, Ghana, Malawi, Tanzania, Sudan y'Epfo n'u Rwanda.