Uyu munsi tariki ya 8 Ukwakira 2024, mu karere ka Rutsiro hakomeje gahunda igamije gukemura ibibazo by'abaturage aho Umuyobozi w'Akarere Madamu Kayitesi Dative yasuye Umurenge wa Manihira. 

Madamu Kayitesi yabanje kuganira n'abayobozi bose kuva ku isibo kugera ku murenge anaganira n'abaturage anakira ibibazo n'ibitekerezo byabo ku gicamunsi.

Abayobozi bagarutse ku bikorwa by'ingenzi birikwitabwaho mu gihugu harimo guhanga imirimo hagabanya abantu badafite kazi,  kurwanya igwingira mu bana, guteza imbere uburezi hazamurwa ireme ryabwo no guteza imbere serivisi inoze.

Ku birebana na serivisi, Abayobozi bashishikarijwe gutanga serivisi uko bikwiye nta kiguzi batse uyikeneye. Umuyobozi w'Akarere, Madamu Kayitesi, yabibukije ko ruswa idakwiye kureberwa asaba abaturage gutanga amakuru aho bayibonye cyangwa bayiketse. Madamu Kayitesi yabibukije ko uzafatwa arimo kwaka cyangwa gutanga ruswa azabiryozwa hubahirijwe amategeko.

Madamu Kayitesi yasabye abayobozi kongera kwitekerezaho: "Twongere twitekerezeho nk'abayobozi twubake ubumwe buzira icyaha n'icyaha. Twirinde ikintu icyo ari cyo cyose cyatubibamo amacakubiri cyane cyane gishingiye ku nda nini. Abayobozi ntidukwiye kureberera Umuyobozi udukorera ibinyuranyije n'amategeko. Umuyobozi ntakwiye kuba imbogamizi ya mugenzi we; ntakwiye kuba inzitizi y'iterambere rya mugenzi we. Dukwiye kwisubiraho tugahindura imitekerereze tugasubira ku ndangagaciro z'umuyobozi ukwiye."

Abayobozi bibukijwe ko batemerewe gukoresha ububasha bahabwa n'amategeko mu nyungu zabo bwite. Umuyobozi ntabwo akwiye kwigira igitangaza. Ahubwo akwiye kurangwa no kwicisha bugufi.

Umuyobozi w'Akarere Wungirije Ushinzwe Iterambere ry'Ubukungu Bwana Uwizeyimana Emmanuel yitabiriye iyi gahunda mu murenge wa Mushubati mu gihe Madamu Umuganwa Marie Chantal yitabiriye iyi gahunda mu murenge wa Murunda.