Akarere ka Rutsiro katangije ku mugaragaro umushinga w’imyaka itanu ugamije gusubiranya ubutaka bwangiritse, kurengera urusobe rw’ibinyabuzima no kuzamura imibereho y’abaturage bo mu Mirenge ya Kigeyo na Mushonyi. Inama yo gutangiza uyu mushinga yabereye ku Cyicaro cy’Akarere iyobowe n’Umuyobozi w’Akarere Wungirije Ushinzwe Iterambere ry’Ubukungu, Bwana Uwizeyimana Emmanuel, ku bufatanye n’Ihuriro Wildlife Conservation Initiative (WCI). Umushinga uzashyirwa mu bikorwa hagati ya 2026 na 2031, ugamije gukemura ibibazo by’isuri, iyangirika ry’inkengero z’imigezi ya Nkora na Biruyi, igabanuka ry’ibiti gakondo ndetse n’umusaruro muke w’ubuhinzi.

Mu kiganiro cyatanzwe na WCI, hagaragajwe ibikorwa by’ingenzi bizibandwaho birimo kurengera inkengero z’imigezi, guteza imbere ubuhinzi buvanzemo ibiti ndetse no kuzamura imibereho y’abaturage. Mu mwaka wa mbere w’umushinga, hateganyijwe gutera ibiti 105,000 birimo ibiti gakondo 52,500 bizaterwa ku nkengero z’imigezi ndetse n’ibiti 52,500 by’ubuhinzi buvanzemo ibiti bizaterwa mu mirima ikikije iyo migezi. Byongeye kandi, abaturage bazahabwa ibiti by’imbuto 30,000 by’avoka. Ibi bikorwa bizakorerwa ku buso bwa hegitari 160, harimo hegitari 60 zo kurengera inkengero z’imigezi na hegitari 100 z’ubuhinzi buvanzemo ibiti.

Uyu mushinga uzagirira akamaro abaturage barenga 730. Mu bikorwa biteganyijwe harimo guha abahinzi 350 imbuto z’imyumbati z’indobanure, gufasha amatsinda abiri y’abahinzi kubona imashini, gutera inkunga amatsinda yo kuzigama no kugurizanya, ndetse no gufasha abantu barindwi bafite ubumuga. Uretse kurengera ibidukikije, umushinga uzanafasha kongera umusaruro w’ubuhinzi, kuzamura amafaranga yinjira mu miryango no guteza imbere imibereho myiza y’abaturage.

Asoza inama, Bwana Uwizeyimana Emmanuel yashimangiye akamaro k’ubufatanye hagati y’inzego zitandukanye n’abaturage kugira ngo umushinga ugere ku ntego zawo. Yagaragaje ko kurengera ibidukikije bigomba kujyana no kuzamura imibereho y’abaturage, anashishikariza abafatanyabikorwa gukoresha neza umutungo n’ahantu hahari kugira ngo ibikorwa bigire uruhare rugaragara kandi birambye mu iterambere ry’Akarere ka Rutsiro.