“Tubegere Duca ingando!” ni gahunda Akarere ka Rutsiro kihaye, abayobozi bo ku rwego rw’Akarere bagamije kwegera abaturage mu gukemura ibibazo byabo no kubashishikariza kwitabira gahunda za Leta ku buryo bwimbitse.

Tubegere Duca ingando ikaba ikorwa iminsi 2 mu cyumweru  ku wa Mbere no ku wa Kabiri aho imaze gukorerwa mu mirenge ya Boneza na Ruhango.

Mu murenge wa Ruhango aho iheruka tariki ya 5 na 6 Ukuboza 2022, ikaba yaritabiriwe n’abayobozi banyuranye mu nzego zitandukanye bayobowe n’Umuyobozi w’Akarere Madamu Murekatete Triphose.

Ku munsi wa mbere, tariki ya 5 Ukuboza 2022, hakozwe ibikorwa bitandukanye birimo inama n'abavuga rikumvikana, kugenzura gahunda za Leta harebwa isuku, kwitabira Ubwisungane mu kwivuza, gahunda ya Ejo Heza, ikibazo cy’imirire mibi mu murenge, gahunda ya Gira inka n’ibindi. Abayobozi bitabiriye inama ni abahagarariye inzego z’umutekano mu karere no mu murenge, abanyamabanga nshingwabikorwa b’utugari, abahagarariye amadini, abahagarariye inama njyanama y’umurenge, abakuru b’imidugudu kimwe n’abahagarariye abajyanama b’ubuzima mu kigo nderabuzima cya Kayove.

Abitabiriye inama bibukijwe ko umuturage akwiye guhora ku isonga, ibyo bakora byose bikajyana ku kumuteza imbere no gutuma atekana. Abayobozi bibukijwe ko bakwiye gutanga serivisi inoze birinda gucuragiza abaturage. Abayobozi kandi basabwe kwirinda ikintu cyose gisa na ruswa cyatuma umuturage atabona uburenganzira bwe mu guhabwa serivisi.

By’Umwihariko, Madamu Murekatete yagarutse ku kibazo cy’imirere mibi n’igwingira rikigaragara mu bana bato. Madamu Murekatete yasabye abayobozi kugira iki kibazo icyabo, bagaharanir ko nta mwana wongera kugwa mu igwingira bagashishikariza ababyeyi gutegura indyo yuzuye. Kuri iyi ngingo, Madamu Murekatete yasabye abayobozi kwibutsa abaturage bahabwa inkunga za Leta mu guhangana n’imirire mibi kuzikoresha uko bikwiye ntawuyigurishije.

Madamu Murekatete ati: “Akarere kiyemeje gukora ibishoboka ngo umubare w'abana bagwingiye ugabanuke. Urugamba rw'iterambere ntabwo twarugeraho mu gihe tugifite abana bagwingiye hakivuka

n'abandi. Dukwiye kubirwanya dushyizemo imbaraga”

Ku munsi wa kabiri tariki ya 6 Ukuboza 2022, mu nama mpuzamikorere y'Umurenge wa Ruhango (JOC), Madamu Murekatete yasabye abayobozi guhuza ibyo bavuga n'ibyo bakora: Ati: "ese Ibyo tuvuga n'ibyo dukora birasa?"

Nyuma y’iyi nama, Madamu Murekatete yagiranye inama n’ababyeyi bafite abana bagaragaraho igwingira mu rwego rwo kubakangurira kwita ku buzima bwabo barwanya imirire mibi. Abaturage bose bibutswa kwirinda ko abana bajya mu igwingira. Madamu Murekatete yasabye ubufatanye bw’umugabo n’umugore mu gushaka iterambere ry’urugo.

Yagize ati: "Umugabo afatanya n'umugore bagashakira urugo rwabo Iterambere. Umugabo ubyukira mu kabari akakirirwamo na we ateza umutekano muke.”

Tubegere Duca Ingando  yakomereje mu nteko z’abaturage aho Madamu Murekatete Triphose yitabiriye inteko y'abaturage mu Murenge wa Ruhango, Akagari ka Kavumu muri santere ya Gakeri. Nyuma yo gukangurira abaturage kwitabira gahunda za Leta no kugira uruhare mu kwikemurira ibibazo, Madamu Murekatete  yakiriye ibibazo n'ibitekerezo byabo.

 Mu butumwa yabahaye harimo kurwanya guta ishuri ku abana, imirire mibi n'igwingira, ubuzererezi n'uburara, ibiyobyabwenge no kubyukira mu tubari." Abaturage basabwe kandi kwikingiza covid-19 ku buryo bwuzuye no gukumira amakimbirane yo mungo.