Uyu munsi tariki ya 29 Kanama 2024, mu murenge wa Boneza, kuri hotel Rushel Kivu Resort, hateraniye inama nyunguranabitekerezo ku bukerarugendo mu karere ka Rutsiro. Inama yayobowe n'Umuyobozi w'Akarere Madamu Kayitesi Dative ari kumwe na Perezida w'abikorera akaba na Perezida w'Inama Njyanama y'Akarere Bwana Matabaro Bernard. Inama yatumiwemo abafite ibikorwa bijyana n'ubukerarugendo n'inararibonye mu bikorwa bigamije guteza imbere Ubukerarugendo.

Umuyobozi wa Pariki Gishwati-Mukura Anaclet Budahera yagaragarije abitabiriye uburyo Ubukerarugendo bukorerwa muri iyi Pariki buhagaze kugeza ubu. Bwana Budahera yagaragaje ko iyi Pariki ifite inyamaswa zitandukanye zikurura ba mukerarugendo kimwe n'ubwoko bw'ibimera bitandukanye utapfa kubona ahandi. 

Mu gukomeza kwagura ibikorwa by'ubukerarugendo, haguzwe hegitari 20 zo guteraho ibiti gakondo (bijyanye na Pariki) zikazafasha inyamaswa kwiyongera no kwisanzura.

Karim Gisagara, inararibonye mu bukerarugendo, yagaragaje amahirwe Akarere gafite yatuma abakerarugendo bagasura. Muri ayo mahirwe, harimo ahantu nyaburanga hanyuranye nk'inkengero z'ikiyaga cya Kivu, imisozi miremire y'isunzu rya Congo Nil, Pariki ya Gishwati-Mukura, ibihingwa by'icyayi n'ikawa n'ibindi.

Umuyobozi w'Akarere Madamu Kayitesi Dative yagaragaje ko kugira ngo ubukerarugendo burusheho gutera imbere, bigikenewe ko hakomeza ubufatanye hagati y'inzego zinyuranye (Leta n'abikorera) kandi abaturage bagatozwa kugira uruhare mu bukerarugendo.

Abari mu nama bagaragaje ko bishimiye intumbero Akarere gafite ku bukerarugendo bizeza gutanga umusanzu wabo ngo ubukerarugendo bugende neza mu karere.

Madamu Kayitesi Dative yashimiye abitabiriye inama yemeza ko imyanzuro yafatiwe muri iyi nama izashyirwa mu bikorwa mu buryo bukwiye. Madamu Kayitesi yasabye abafatanyabikorwa gukomeza ubufatanye mu iterambere ry'Akarere anabizeza ko ubuyobozi bw'Akarere buzakomeza kunoza imikorere n'imikoranire.