Mu karere ka Rutsiro, hagamijwe kwimakaza ihame ry’Imiyoborere Myiza, Ubuyobozi bw’Akarere bwashyize gahunda yitwa TUBEGERE, gahunda igamije kwegera abaturage aho batuye mu rwego rwo kumenya ubuzima babayemo no kabakemurira ibibazo bafite.

Ni muri urwo rwego uyu munsi tariki ya 27 Nzeri 2022, mu matsinda atandukanye ayobowe n’abagize Komite Nyobozi y’Akarere ka Rutsiro basuye imirenge itandukanye hagambiriwe gusura abaturage no gukemura ibibazo byabo.

Abayobozi bakaba basuye imirenge mu matsinda 3 aho itsinda ryari riyobowe n’Umuyobozi w’Akarere ka Rutsiro, Madamu Murekatete Triphose ryasuye Umurenge wa Kigeyo, iryari riyobowe n’Umuyobozi w’Akarere Wungirije Ushinzwe Iterambere ry’Ubukungu Bwana Etienne Havugimana rigasura Umurenge wa Kivumu irindi rigasura Umurenge wa Nyabirasi riyobowe n’Umuyobozi w’Akarere Wungirije Ushinzwe Imibereho Myiza y’Abaturage.

Uru ruzinduko rwo gusura imirenge rukaba rwabanjirijwe no gusura ibikorwa by’iterambere biri muri iyo mirenge ahasuwe ibigo by’amashuri, abaturage batishoboye borojwe ingurube hagenzurwa uburyo zifashwe, inzu zubatswe mu rwego rwo guteza imbere ubukerarugendo mu karere n’amazu kimwe n’inka zatanzwwe muri gahunda ya Gira inka.

Nyuma yo gusura ibi bikorwa, abayobozi bahuriye n’abaturage bo muri iyo mirenge 3 mu murenge wa Kivumu ku kibuga cya Paruwasi ya Kivumu mu rwego rwo gukemura ibibazo bitandukanye. Abaturage bari bafite ibibazo bakaba bakiriwe, bagaragaza ibibazo  byabo ubuyobozi bw’Akarere, Inzeo z’Umutekano n’Abanyamategeko bagahita babafasha kubikemura ndetse no kubagira inama ku buryo ibitakemutse byakemuka.

Nyuma yo gukemura ibibazo, Umuyobozi w’Akarere Madamu Murekatete Triphose, akaba yibukije abaturage ko byaba byiza birinze amakimbirane kandi bagakora ibishoboka ibibazo bakabikemura mu bwumvikane kubera ko amakimbirane n’imanza bituma ubukungu bw’umuryango busubira inyuma.

Umuyobozi kandi yakanguriye abaturage kwirinda ibyorezo bitandukanye harimo COVID-19 bikingiza bikwiriye ndetse na Ebola yagaragaye mu gihugu cy’abaturanyi cya Uganda. Yabasabye gutangira amakuru ku gihe bakamenya ingendo z’abagenderera ingo zabo kandi na bo bakirinda ingendo zitari ngombwa zerekeza muri icyo Gihugu.

Abaturage bakaba bagaragaje ko bishimiye iyi gahunda yashyizweho n’Ubuyobozi bwo kubegera.