Uyu munsi tariki ya 21 Kanama 2023, kuri hotel Ibigabiro ishami rya Rutsiro habereye inama nyunguranabitekerezo yateguwe na Minisiteri y'Abakozi ba Leta n'Umurimo (MIFOTRA) ku bufatanye n'Akarere. Iyi nama ikaba yakozwe muri gahunda ngari ya MIFOTRA yo gukora ibiganiro muri buri Karere bigamije guhuza imbaraga z'abafatanyabikorwa  bose b'Akerere  mu guteza imbere umurimo unoze, kugaragaza ishusho  y'ihangwa ry'umurimo, ingamba zafasha mu kwihutisha  ihangwa ry'imirimo mishya,  kumurika amahirwe y'ishoramali,  amahirwe yo kwihangira imirimo,  imishinga minini yitezweho  gutanga akazi,  gahunda zigamije gufasha urubyiruko n’abagore kwikorera no kwiteza imbere.  

Iyi nama mu karere ka Rutsiro yahurije hamwe inzego zitandukanye harimo abikorera, Abahagarariye imiryango itari iya Leta, Sosiyete sivile, n'abandi bafatanyabikorwa nka Enabel.

Inama yari iyobowe n’Umuyobozi w’Agateganyo w’Akarere Bwana Mulindwa Prosper.

Bwana Mulindwa yasabye ko buri rwego rukwiye gushyiraho gahunda yo guhanga y’uburyo bagomba gukirina amahirwe ari mu mafasi yabi atanga akazi kandi bigakorerwa ubugenzuzi buri cyumweru binyuze mu ishami ry’Iterambere no guhanga umurimo.

Bwana Mulindwa yagaragaje kandi ko ikigereranyo cy’ubushomeri kigenda kizamuka uko iminsi yicuma bishongiye ku bushakashatsi bugenda bukorwa

Yagize ati: “…kuva 2016, Leta y’u Rwanda ishyira hanze buri mezi atatu (3) uko ibipimo by’isoko ry’umurimo bihagaze, isesengura rigenda ritwereka abaza ku isoko ry’umurimo ari benshi ugereranyije n’amahirwe y’umurimo aba asanzweho. Ibi rero bigira ingaruka aho igipimo cy’ubushomeri kigenda kizamuka mu gihugu aho mu mwaka wa 2022 cyari  kuri 20.5% kivuye kuri 17.3% mu mwaka wa 2017...”

Agaruka ku karere ka Rutsiro, Bwana Mulindwa yagarutse ku ishusho ikurikira: “…ibarura rusange riheruka ryabaye 2022 ryerekanye ko dufite abaturage 369,180 ku buso bwa 1,157.3 KM2 ariko ubushakashatsi ku bakora n’abadakora bwo muri uwo mwaka bwerekana ko igipimo cy’abakora kiri kuri 46,3%. Mu gihe igipimo cy’ubushomeri kiri kuri 19.68%, Akarere kacu kandi kakaba gafite indi mbogamizi y’uko 38.24% by’urubyiruko rutari mu ishuri, ntirube mu kazi cyangwa se mu mahugurwa azabafasha kubona akazi.”
Mu kiganiro cyatanzwe n’inararibonye ku cyakorwa ngo habashe guhangwa umurimo unoze, hagaragajwe ko urugendo rucyiri rurerure mu guhanga umurimo unoze n'ubwo hari byinshi bimaze gukorwa.

Asoza inama, Bwana Mulindwa yagaragarije abayobozi ko guhindura imyumvire ari byo byonyine byafasha abantu guhanga umurimo unoze. Yagize ati: "Bayobozi bo muri Rutsiro, biradusaba guhindura imitekerereze. Ni bwo tuzakemura ikibazo cy'abantu badafite imirimo. Buri wese natekereza cyane, iki kibazo kizakemuka vuba."