Uyu munsi tariki ya 6 Gashyantare 2024, Akarere ka Rutsiro kakiriye itsinda riturutse  ku rwego rw'Intara riyobowe na Guverineri w'Intara y'Uburengerazuba Bwana Dushimimana Lamebert rije gusuzuma aho imihigo ijyanye no gukemura ibibazo bibangamiye imibereho myiza y'abaturage igeze yeswa.

Iri tsinda ryakiriwe n'Umuyobozi w'Akarere ka Rutsiro Madamu Kayitesi Dative ari kumwe n'abakozi bakorera ku rwego rw'Akarere, abanyamabanga nshingwabikorwa b'imirenge, abahagarariye inzego z'abagore n'inzego z'urubyiruko n'abagize inama y'umutekano y'Akarere itaguye.

Iri suzuma ryakozwe hasuzumwa raporo z'imihigo itandukanye n'imikorere y'amatsinda yihariye ashinzwe gukurikirana imikemurire y'ibibazo bibangamiye abaturage mu mirenge no ku karere, hanasurwa  imihigo aho iherereye.

Madamu Umuganwa Marie Chantal, Umuyobozi w'Akarere Wungirije Ushinzwe Imibereho Myiza y'Abaturage, yagejeje ku bitabiriye iki gikorwa aho Akarere kageze gashyira mu bikorwa imihigo kihaye igamije gukemura ibibazo bibangamiye imibereho myiza y'Abaturage.

Abagize itsinda batanze ibitekerezo n'inama zigamije kunoza imikorere y'itsinda ryihariye rigamije gukurikirana imikemukire y'ibibazo bibangamiye imibereho myiza y'Abaturage no kurushaho gukurikirana ibi bibazo bigakemuka mu buryo bukwiye.

Madamu Kayitesi yasezeranyije ko Akarere kagiye gukomeza gushyira imbaraga mu kunoza raporo zitandukanye hubahirizwa ibiteganyijwe. Yasezeranyije ko Akarere kazakomeza guteza imbere ubufatanye bw'inzego zitandukanye mu nzira yo gukemura ibi bibazo.

Goverineri Hon Dushimimana yasabye abari mu nama gusobanukirwa neza ko ari inshingano za buri wese mu gutuma ibibazo bibangamiye abaturage bikemuka: "kumva ko gukemura ibibazo ari ibyawe kandi ufite umuhate wo kubirangiza ni cyo cyonyine cyizatuma ibi bibazo tubirangiza. Ibintu byinshi byicwa no kutanoza imikoranire no kumva ko ibintu bitakureba ahubwo bireba abandi."

Nyuma yo kuganira kuri raporo zatanzwe, abagize itsinda basuye imihigo iherereye mu murenge wa Ruhango na Kigeyo baherekejwe n’Umuyobozi w’Akarere Wungirije Ushinzwe Imibereho Myiza y’Abaturage Madamu Umuganwa.

Guverineri Hon. Dushimimana  ari kumwe n’Umuyobozi w’Akarere Madamu Kayitesi bakomereje mu nteko y’abaturage mu murenge wa Musasa Akagari ka Nyarubuye aho bakanguriye abaturage gukomeza gahunda za Leta harimo kugira isuku, kujyana abana bose ku ishuri, gutanga umusanzu w’ubwisungane mu kwivuza, kwirinda amakimbirane yo mu ngo, … Hon. Dushimimana yakiriye anakemura ibibazo by’abaturage.