Uyu munsi tariki ya 31 Mutarama 2024, mu cyumba cy'inama cy'Akarere hateraniye inama yateguwe ku bufatanye bw'Akarere na CARITAS NYUNDO. Inama yahuje 'abashinzwe ubuzima mu mirenge n’abakorerabushake bashinzwe gukurikirana amarerero (ECD) aho buri Murenge ufite abakorerabushake 3.

Iyi nama yateguwe mu rwego rwo gusuzumira hamwe icyakorwa ku iterambere ry'amarero buri wese azirikana ko afite uruhare rukomeye mu gutuma ECDs zirushaho gukora neza.

Iyi nama yayobowe n'Umuyobozi w'Akarere Wungirije Ushinzwe Imibereho Myiza y'Abaturage Madamu Umuganwa Marie Chantal mu gihe CARITAS NYUNDO yari ihagarariwe na Padiri RUTAKISHA Jean Paul akaba n’Umuyobozi wayo.

Madamu Umuganwa yashimiye CARITAS ku ruhare bagira mu gufasha Akarere gukurikirana, gusura, guhugura no kumenya ibibazo biri mu marerero hakabaho ubufatanye mu kubishakira umuti. Yasabye CARITAS gukomeza gufasha Akarere imibereho y'Abaturage igahinduka myiza kurushaho harwanywa imirire mibi.

Muri iyi nama, CARITAS ikaba yagaragarije abitabiriye ibikorwa imaze kugeraho harimo kuba ikurikirana amarerero 1425 zifasha kwita ku bana 28122. CARITAS ikaba yaratanze ibikoresho byifashishwa mu gufasha amarerero harimo amasafuriya, ibikombe, imikeka n’ibindi.

CARITAS yanagaragaje imbogamizi  ihura na zo mu gufasha amarerero harimo kuba amarerero atarabona ibikoresho bihagije byo kuyafasha mu kwita ku mwana, ibikorwa by’imfasha nyigisho bidahagije, aho abana bigira hatujuje ibisabwa, abana bagikora ingendo ndende bagana aho amarerero akorera, abita ku marerero badafite ubumenyi buhagije bwo kuyitaho n’izindi.

Mu rwego rwo guteza imbere imikorere ihamye y’amarerero, CARITAS irateganya guhugura abantu 3000 bitarenze Werurwe 2024, kuganiriza ababyeyi bafite abana bari mu irerero ku ruhare rwabo mu guteza imbere imikurire y’abana babo, n’ibindi.

Madamu Umuganwa yasabye buri wese gusobanukirwa neza ko afite uruhare mu gutuma imikurire y'umwana igenda neza: "Twebwe tureberera amarerero, ni twebwe dukwiye gutuma imikorere yayo igenda neza. Dukwiye gufatanya tugasangira amakuru ku buryo tuba dufite amakuru amwe n’imibare isa mu nzego zose."

Madamu Umuganwa yijeje CARITAS ko Akarere kazakomeza guteza imbere ihame ry'ubufatanye mu bikorwa byo guteza imbere amarerero. Yasabye abakozi bakurikirana amarerero baba abakorerabushake ba CARITAS, abakozi ba Leta cyangwa ab’imiryango yindi kugaragaza imbogamizi zatuma irerero ridakora neza hakiri kare kugira ngo inzego bireba zibishakire igisubizo.

Yagize ati: “kwita ku mwana w'umunyarwanda tukamurinda igwingira tumufasha gukura mu gihagararo, mu bumenyi, mu mbamutima, isuku,… mu buryo bukwiye tubigire intego.”

Padiri Rutakisha yashimiye ubufatanye bwiza buranga Akarere ka Rutsiro n’abafatanyabikorwa yizeza ko CARITAS izakomeza gutanga umusanzu wayo mu guteza imbere imibereho myiza y’umuturage.