Mu karere ka Rutsiro habaye inama yahuje Ubuyobozi bw'Akarere ka Rutsiro n'abakozi bafite uruhare rukomeye mu mibereho myiza y'abaturage  iyobowe n'Umuyobozi w'Akarere Wungirije Ushinzwe Imibereho myiza y'Abaturage. Abitabiriye iyi nama barimo abayobozi b'ingabo kuva ku rwego rw'umurenge kugera ku rw' Akarere, abayobozi ba Police kuva ku rwego rw'amasitasiyo kugera ku karere , abanyamabanga Nshinhwabikorwa b'imirenge n'ab'utugari, abakozi bashinzwe imibereho myiza mu mirenge, abahuzabikorwa b'urwego rwa Dasso mu mirenge no mu karere, abayobozi b'Umurenge Sacco, RSSB, abashinzwe gahunda y'ubwisungane ku mavuriro n'abayobozi bayo, n'abahagarariye amadini mu karere. Iyi nama yari igamije kurebera hamwe intambwe imaze guterwa mu kurwanya ibibazo bibangamiye imibereho myiza y'abaturage harimo isuku nke (ubuwiherero budahwitse, amazu atabereye guturwamo, abaturage babana n'amatungo, n'ibindi), n'imirire mibi.
Muri iyi nama kandi hanasuzumwe uburyo gahunda y'Ubwisungane mu kwivuza ihagaze hagaragazwa raporo y'umwaka ushize hanamenyekanishwa uburyo bushya umusanzu w'ubwisungane mu kwivuza uzajya utangwa hakoreshejwe ikoranabuhanga. Kuri ubu, ushaka gutanga umusanzu we ashobora gukoresha telefoni njyendanwa akanda *999# ubundi ugakurikiza amabwiriza, cyangwa ukajya ku murenge sacco ukwegereye ugafashwa kubona iyo serivisi. Inama yashojwe hafashwe ingamba zo guca uburundi ibibazo bibangamiye ubuzima bw'umuturage buri mukozi amenyeshwa inshingano zihariye akwiye kwitaho n'uburyo bwo kuzitangira raporo. Abitabiriye inama bemeje ingebihe y'ibikorwa bigamije guca burundu ibi bibazo kugira ngo ubuzima bw'umuturage buhore ku isonga.