Uyu munsi tariki ya 03 Mata 2019 ni bwo imurikabikorwa ry'akarere ka Rutsiro ku nshuro ya 8 ryatangiye ryitabirwa n'abafatanyabikorwa b'ingeri zose.

Ubusanzwe iri murikabikorwa ritegurwa n'akarere ku bufatanye n'abafatanyabikorwa bako bagize JADF Komezimihigo y'akarere rikakamara iminsi 3.

Kuri iyi nshuro, ririkubera mu murenge wa Ruhango ku kibuga cya Bugaboabaturage bagaragarizwa ibikorerwa mu karere n'ibibakorerwa.

Abaturage bitabiriye imurikabikorwa bahabwa serivisi za Leta zitandukanye harimo iz'irangamimerere harimo kwandika abana bavutse, kwandukuza abitabye imana, kwandika abazashyingirwa by'umwihariko hakazabaho igikorwa cyo gusezeranya imiryango itandukanye mu gusoza iri murika bikorwa.

Iri murikabikorwa (Open Day) ryafunguwe n'Umuyobozi w'akarere ka Rutsiro Ayinkamiye Emérence ari kumwe n'abayobozi b'akarere bungirije bombi n'inzego z'umutekano zikorera mu karere.

Mu ijambo rye, Ayinkamiye yashimiye cyane abafatanyabikorwa ku bufatanye n'ubwitange bakomeza kugaragariza akarere ka Rutsiro, abizeza ku borohereza uko bishoka kose mu kazi ka buri munsi. Yasabye abaturage kwitabira kumenya ibibakorerwa ndetse no guhaha ubwenge ku dushya twagaragaye muri iyi Open Day. Yakomeje asaba abaturage gukunda umurimo bagakura amaboko mu mifuka kuko kudakora ari yo ntandaro y'ubukene.

Uwari uhagarariye abafatanyabikorwa Nyandwi Emmwanuel akaba n'Umuyobozi w'APESEK Girimpuwe akaba nawe yarashimye imikoranire y'ubuyobozi bw'akarere n'abafatanyabikorwa asezeranya ko bazakomeza gukora uko bashoboye bahindura imibereyo y'abagenerwabikorwa.

Abitabiriye kandi basusurukijwe n'umuhanzi Bruce Melody na we wari wabukereye mu gutangiza iki gikorwa ngarukamwaka.