Kuri iki cyumnweru tariki ya 10 Mata 2022, mu cyumba cy'inama cy'Akarere ka Rutsiro hateraniye inama y'Inama Njyanama y'Akarere ka Rutsiro idasanzwe iyobowe na Perezida wayo Madamu Nyirakamineza Marie Chantal.

Iyi nama yari ifite ingingo 3 yagombaga gusuzuma ku buryo bukurikira:

1. Gusiba inguzanyo za VUP mu bitabo by'imari bigaragaragara ko zidashobora kwishyurwa ku mpamvu zitandukanye,

2. Gusonera Rwiyemezamirimo wakoreshaga Hotel y'Akarere amafaranga y’ubukode n’ imisoro ku  bacuruzi bagaragaje ko batakoze mu gihe ibikorwa by'ubucuruzi bitakoraga kubera Covid 19,

3. Kurahira k’umujyanama uhagarariye PSF Bwana Jean Baptiste HABYARIMANA.

Inama Njyanama ikaba yashoje imirimo yayo nyuma yo gusuzuma ingingo zavuzwe haruguru ikabona ko zifite ishingiro ikazemeza uretse ubusabe bwa  Rwiyemezamirimo wakoresha Hotel y’Akarere byagaragaye ko dosiye yatanze hari ibitarasobanuka uko bikwiye hemezwa ko igomba konera gusuzumwa.

Amafaranga  yasonewe yose hamwe akaba angana na miliyoni ijana na mirongo irindwi n’imwe iibihumbi magana inani na mirongo itatu na bine magana atanu na cumi (Rwf 171 834 510) ku buryo bukurikira:

1.  Abaturage bahawe inguzanyo muri VUP bagakora imishinga igahura n’ibiza: Rwf 26 093 722,
2. Abaturage bahawe inguzanyo muri VUP ariko bikagaragara ko bagiye mu bukene bukabije ku buryo batabasha kwishyura: Rwf 143 314 788,
3. Abaturage bahawe inguzanyo muri VUP nyuma bakitaba imana: Rwf298 500,
4. Abaturage bahawe inguzanyo muri VUP ariko bakaba barimukiye ahantu hatazwi: Rwf 2 127 500

Ubusanzwe umuntu uhabwa amafaranga y’inguzanyo muri VUP ni umuturage wo mu cyiciro cy’ubudehe cya I, icya II n’icya III agahabwa amafaranga atarenze ibihumbi ijana (Rwf100,000) yishyurwa mu myaka 2 ku nyungu y’amafaranga 2 ku ijana. Uwo mu cyiciro cya 3, aba ari umuturage bigaragara ko atabonye iyo nguzanyo bishobora kumuviramo gusubira inyuma mu bukungu akaba yamanuka ajya mu cyiciro cya II.  

Tugarutse ku ngingo ya 3, Umujyanama uhagarariye PSF Bwana Habyarimana Jean Baptiste akaba yarahiriye inshingano mu muhango wayobowe n’Intumwa ya Guverineri w’Intara y’Iburengerazuba Bwana TUYISENGE Emmanuel imbere y’abajyanama bagenzi be. Bwana Habyarimana Jean Baptiste yarahijwe kandi indahiro ye yakirwa na Perezida w’Urukiko Rwisumbuye rwa Karongi Madamu RIZIKI Isabelle wari kumwe n’umwanditsi warwo Manirarora Louise.

Intunwa ya Guverineri yashimiye umujyanama Bwana Jean Baptiste Habyarimana ku cyizere yagiriwe amwibutsa ko umurimo w’ubujyanama ari ubukorerabushake amusaba kurushaho gushyiramo imbaraga kimwe n’abandi bose.