Uyu munsi inama nyjanama y'Akarere ka Rutsiro yateranye iyobowe na Perezida wayo Bwana Matabaro Bernard. Iyi nama yitabiriwe kandi n'abanyamabanga nshingwabikorwa b'imirenge y'akarere ka Rutsiro, abayobozi b'amashami mu karere n'inzego z'umutekano zikorera mu karere. Iyi nama yari ifite kuri gahunda ibyigwa bitandukanye harimo: 1. Kurebera hamwe uko ingengo y'imari y'Akarere y'umwaka wa 2018/1019 yashyizwe mu bikorwa, 2. Kwemeza ingengo y'imari y'Akarere y'umwaka wa 2018/2019, 3. Kwemeza ibipimo by'imisoro n'amahoro bizagenderwaho mu karere mu mwaka wa 2018/2019, 4. Kwemeza imihanda y'Akarere iri mu kiciro cya 2, 5. Kugaragarizwa no kwemeza imihigo Akarere gateganya gushyira mu bikorwa mu mwaka wa 2018/2019. Ni muri urwo rwego Umuyobozi w'Akarere ka Rutsiro, Ayinkamiye Emérence yagejeje imihigo ku bitabiriye inama Njyanama harimo:
Umuhanda Gisiza-Murunda biteganyijweko uzashyirwamo kaburimbo mu mihigo ya 2018/2019. Imiryango ikenye ikazahabwa amatungu muri gahunda ya gira inka, urubyiruko ruhabwe inkoko zo mu bwoko bwa kijyambere zitera amagi kandi runahabwe amahene ari na ko akarere gakomeza urugamba rwo guhashya Imirire mibi.
Mu bijyanye n'imibereho myiza y'abaturage, Postes de sante 6 zishobora no kwiyongera zizubakwa. Ibyumba by'amashuri bishaje bivugururwe. Abakuze batazi gusoma no kwandika babyigishwe .Amazi meza azakomeza agezwa Ku baturage habungwabungwa imiyoboro isanzwe; hahangwe n'imishya.
Mu bijyanye n'iterambere ry'abaturage, ingo zisaga 2000 biteganyijwe ko zizahabwa amashanyarazi akomoka Ku ngufu z'amazi.
Imiyoborere myiza izakomeza kwimakazwa binyujijwe mu myidagaduro n'ibiganiro ndetse no gukemura ibibazo by'abaturage binyuze mu marushanwa y'Umurenge Kagame Cup, Umugoroba w'Ababyeyi n'izindi gahunda hari mo umuganda.
Akarere kandi gafite gahunda yo gukomeza kuzamura Amafaranga yinjizwa n'Akarere aho gateganya kuzakusanya imisoro n'amahoro bisaga miliyoni 600 z'amanyarwanda. Akarere kandi kagaragaje ko kazakomeza kwita ku mikoreshereze inoze y'imari ya Leta binyuze mu kugenzura ibigo bifite aho bihurira n'amafaranga ya Leta. Ibi bikorwa byateganyijwe mu mihigo ni byo Akarere kateganyirije ingengo y'imari isaga gato miliyari 15 z'amanyarwanda na Inama Njyanama y'Akarere ibonako bikwiriye iyiha umugisha irayemeza.