Uyu munsi tariki ya 7 Ukwakira 2024, Akarere ka Rutsiro kakiriye itsinda riturutse ku rwego rw'Intara y'Iburengerazuba riyobowe na Madamu Florence Uwambajemariya, Umunyamabanga Nshingwabikorwa w'Intara y'Uburengerazuba.

Iri tsinda rishinzwe gukurikirana uburyo ibibazo bibangamiye Imibereho Myiza y'Abaturage kubrwego rw'Intara ryasuye Akarere mu rwego rwo gusuzuma aho Akarere kageze mu rugamba rwo kubikemura.

Abagize Itsinda bahawe ikaze n'Umuyobozi w'Akarere Madamu Kayitesi Dative ari kumwe n'abahagarariye inzego zinyuranye mu karere. Iri suzuma rigambiriye kureba aho Akarere kageze mu rugendo rwo gukemura ibi bibazo mu gihembwe cya I, riragenzura raporo zitangwa hanasurwe bimwe mu bikorwa aho biherereye.

Madamu Uwambajemariya yasonanuye ko isuzuma riba rigamije kureba ibintu bitandukanye harimo udushya Akarere gakoresha mu gukemura ibi bibazo, imikoreshereze y'ingengo y'imari n'ibindi hagamijwe kureba icyatuma ibikorwa byihuta kurushaho kandi bigenda neza.

Nk'uko Umuyobozi w'Akarere yabigarutseho, ibibazo bibangamiye abaturage bibarirwa mu byiciro 12.

1. Abatishoboye badafite amacumbi

2. Amacumbi ameze nabi adakwiye guturwamo

3. Abantu batuye mu manageka

4. Adafite ubwiherero

5. Ubwiherero butujuje ibisabwa

6. Imirire mibi

7. Abaturage harwaye amavunja

8. Abaturage babana n'amatungo

9. Abangavu batewe inda

10. Abana bakoreshwa imirimo mibi

11. Abana bata ishuri

12. Abagizweho ingaruka n'ibiza

Umuyobozi w'Akarere Wungirije Ushinzwe Imibereho Myiza y'Abaturage Madamu Umuganwa Marie Chantal yagaragarije abitabiriye raporo y'aho Akarere kageze gakemura ibi bibazo hanyuma abagize itsinda ryaturutse ku rwego rw'Intara basura ibikorwa bitandukanye biri muri gahunda yo gukemura ibi bibazo mu mirenge ya Gihango na Mushubati.

Mu gukemura ibi bibazo bibangamiye abaturage, Akarere kateganyije ingengo y'imari isaga miliyoni 102 ariko kurwanya imirire mibi bikagira iyabyo yihariye isaga miliyoni 228 000 000.