Uyu munsi tariki ya 27 Kanama 2025, itsinda ry'abakozi baturutse mu Karere ka Nyanza bayobowe n'Umunyamabanga Nshingwabikorwa w'Akarere ka Nyanza Bwana Kamana Jean Marie basuye Akarere ka Rutsiro mu rugendoshuri rwo kureba imikorere y'ikigo cy'urubyiruko cya Rutsiro.

Bageze mu Karere bakiriwe na Bwana Uwizeyimana Emmanuel, Umuyobozi w'Akarere Wungirije Ushinzwe Ubukungu akaba n'Umuyobozi w'Inama y'Ubutegetsi y'Ikigo cy'Urubyiruko ari kumwe n'Umunyamabanga Nshingwabikorwa w'Akarere.

Abashyitsi bagaragarijwe mu ncamake amakuru akubiyemo imikorere y'Ikigo cy'Urubyiruko mbere y'uko basura ikigo ku cyicaro cyacyo mu murenge wa Ruhango.

Ikigo cy'urubyiruko cyimaze imyaka 15 gitanga serivisi ku rubyiruko nyuma yo gufungura imiryango mu 2010 ku nkunga ya Global Fund. Serivisi zitangirwa mu Kigo cy'Urubyiruko ni izijyanye n'ubuzima ( gupima sida, gupima ko umuntu atwitwe, kurwanya ihohoterwa rishingiye ku gitsina, n'izindi), guteza imbere ubumenyi ngiro bugamije guteza imbere gahunda yo kwihangira imirimo (ubudozi, ...) gutoza urubyiruko gukoresha ikoranabuhanga hagamijwe ko baribyaza umusaruro, guteza imbere siporo n'imyidagaduro, ubukangurambaga ku burere mboneragihugu, gutanga serivisi z'isomero, n'ibindi.

Bwana Kamana Jean Marie yashimiye uburyo ubuyobozi bw'Akarere bwabakiriye anashima uburyo ikigo cy'urubyiruko kigira uruhare mu guteza urubyiruko imbere.

Ikigo cy'urubyiruko cya Rutsiro gifite amashami 3; rimwe mu murenge wa Ruhango ari na ho Cyicaro, irya 2 mu Murenge wa Gihango n'irya 3 riri mu Murenge wa Mukura.

Mu gufasha urubyiruko kwiteza imbere, iki kigo cyemerewe kwigisha imyuga by'igihe gitoya kigatanga impamyabushobozi ya Level I yemewe na NESA ku bufatanye na RTB (Rwanda TSS Board)