Uyu munsi tariki ya 4 Nyakanga 2023 mu karere ka Rutsiro hizihijwe isabukuru yo Kwibohora ku nshuro ya 29 mu mirenge yose. Ku rwego rw'Akarere, ibirori byizihirijwe mu murenge wa Mushubati, Akagari ka Bumba.

umushyitsi Mukuru muri ibi birori yari Nyakubahwa Minisitiri w'Umutekano Alfred Gasana aho wanitabiriwe na PES w'Intara Madamu Uwambajemariya Florence,  Umuyobozi w'Akarere w'Agateganyo Bwana Mulindwa Prosper, Abayobozi ba World Vision, Abayobozi b'Inzego z'umutekano n'abaturage bo mu mirenge ya Mushubati na Gihango.

ibi birori byahujwe no gutaha ibikorwa no gutaha ibikorwa bitandukanye byagezweho mu mwaka wa 2022/2023 harimo ibiraro, amashuri, inzu zubakiwe abatishoboye n'ibiro by'utugari dutandukanye. Ari kumwe n'abayobozi b'Akarere, Minisitiri Bwana Gasana Alfred yatashye ECD Center ya Sure n'Inzu z'abatishoboye mu murenge wa Kivumu.

Abitabiriye ibirori babanje umutambagiro wo kuzirikana ibyiza bimaze kugerwaho mu karere bayobowe na Minisitiri wa Minisiteri y'Umutekano Bwana Gasana Alfred.

Mu ijambo rye ry'ikaze, Umuyobozi w'Akarere w'Agateganyo Bwana Mulindwa Prosper yagaragajeko kwibohora kwiza ari ukwibohora ubukene, kurwanya igwingira aho abana bahawe amata, no guharanira kwihaza mu biribwa. 

Mu ijambo rye, Minisitiri yashimiye Umukuru w'Igihugu wayobowe urugamba rwo kubohora igihugu n'Ingabo yari ayoboye zari iza RPA. Yasabye abaturage ba Rutsiro gukomeza kwiyubaka ati: "Mukomeze myibubake, mwiyubakire Akarere kanyu. Ntawuzasenya ibyo tugenda tugeraho."

Minisitiri yagarutse ku bavuga igihugu nabi agaragazako ntabushobozi bafite bwo gusubiza igihugu inyuma asaba abitabiriye kuba abahamya n'Iterambere uRwanda rumaze kugeraho bakoresheje inzira zose zishoboka harimo n'ikoranabuhanga. Ati: "abavuga Igihugu cyacu nabi barabizi ko ntambaraga bafite nta n'izo bazanabona zo gusubiza uRwanda mu icuraburindi."

Yasabye abaturage gukunda no kwitabira umurimo kuko ari wo soko y'iterambere. Yasabye Abayobozi kwirinda imikorere mibi yasubiza abaturage inyuma. Ati: "mbere yo kugira icyo dusaba umuturage tugomba kumubera intangarugero."

Minisitiri kandi yagejeje ku baturage ishinwe ry'Umukuru w'Igihugu Nyakubahwa Perezida Paul Kagame aho yashimiye abaturage uruhare bagize mu kugarura Umutekano bafasha guhashya abacengezi no gufasha bagenzi babo bari bahuye n'ibiza biherutse kwibasira Akarere ka Rutsiro.

Asoza ijambo rye, Bwana Gasana yifurije abaturage ba Rutsiro n'abanyarwanda bose muri rusange umunsi mwhiza wo Kwibohora.

Uyu munsi wizihijwe hazirikanwa insanganyamatsiko igira iti: "Kwibohora Isoko yo kwigira!"