Uyu munsi tariki ya 13 Kamena 2024, ku bufatanye na ORORA WIHAZE, mu karere ka Rutsiro ku kibuga cya Mukebera giherere mu murenge wa Mushubati habereye ubukangurambaga bwo gushishikariza abaturage kurya ibikomoka ku matungo. Ni ubukangurambaga bwakozwe hagamijwe kurwanya imirire mibi.

Umuyobozi w’Akarere ka Rutsiro, Madamu Kayitesi Dative, witabiriye iki gikorwa yibukije abaturage ko ibikomoka ku matungo atari iby'abifite gusa. Yashishikarije abaturage korora amatungo magufi harimo inkoko zishobora kubafasha kubona amagi yo kugaburira abana. Madamu Kayitesi yabwiye abaturage ko  ibikomoka ku matungo bitarindira ko umuntu abona inyama z’inka cyangwa se izindi zishobora gusaba ubushobozi buremereye cyangwa se ngo bigombere ubwinshi. Umuntu ashobora no kugaburira umwana indagara, ifu yazo cyangwa akamugaburira injanga atibagiwe no kumuha amata.

Madamu Kayitesi yashimiye Orora Wihaze ku ruhare rwayo mu gufasha abaturarye kurya neza bakirinda imirire mibi. Yibukije abaturage ko ibikomoka ku matungo bidakwiye guharirwa abafite amikoro ahambaye gusa. Abana bashobora guhabwa amagi, isambaza, n'ibindi bidasaba ubushobozi buremereye.

Binyuze mu mikino itandukanye y'Urunana, abitabiriye bashishikarijwe gufatanya mu guhahira umuryango bidahariwe umwe. Bikanguriwe kudasesagura umutungo w’urugo bawukoresha mu bidakwiye bakanirinda amakimbirane yo mu ngo kuko nay o agira uruhare mu gutuma umuryango udatera imbere mu bukungu bityo ubuzima bw’abana bato bukahazaharira.

Uretse abaturage baturiye ikibuga cya Mukebera bo mu mirenge ya Mushubati na Gihango, ubu bukangurambaga bwanitabiriwe n’abakorerabushakee ba Orora Wihaze bakorera mu mirenge Orora Wihaze Ikoreramo.