Uyu munsi tariki ya 4 Kanama 2023, mu Rwanda hizihijwe umunsi w'Umuganura umwaka wa 2023.
Ku rwego rw'Igihugu, Umuganura wizihirijwe mu karere ka Rutsiro mu Murenge wa Ruhango, Akagari ka Nyakarera ku kibuga cy'umupira w'amaguru cya Bugabo.

Adahigwa mu mihigo ba Rutsiro batewe ishema no kwakira ibirori byo kwizihiza umuganura 2023. Bifatanyije n'abahanzi Senderi Hit, Intore Tuyisenge n'Urunana Communication basusurukije abitabiriye ibirori.
Umuganura wizihijwe hazirikanwa insanganyamatsiko igira iti: "Umuganura isoko y'Ubumwe n'ishingiro ryo kudaheranwa!"

Mu butumwa bw'urunana, abitabiriye bakanguriwe gutegura indyo yuzuye binyuze mu ikinamico ngufi bibutswako ari byiza kugaburira umwana igi rimwe ku munsi. 

Muri ibi birori, abikorera bakaba bagaragaje mu imurikagurisha rito umusaruro utandukanye harimo n'umwihariko wa Rutsiro w'Ikawa, Icyayi n'amabuye y'agaciro.

Umuyobozi w'Agateganyo w'Akarere ka Rutsiro Bwana Mulindwa Prosper yahaye ikaze Minisitiri Dr Ildephonse Musafiri nk' umushyitsi Mukuru n'abandi bashyitsi batandukanye bari kumwe mu birori byo kwizihiza Umuganura 2023. Bwana Mulindwa yagaragarije abashyitsi n'abitabiriye mu nshamake ibyo Akarere karimo kuganura harimo amabuye y'agaciro, Icyayi, Kawa n'ibindi.

Guverineri w'Intara y'Uburengerazuba Bwana Habitegeko François mu ijambo rye yashimye ko Guverinoma y'U Rwanda izirikana Intara y'Uburengerazuba tukaba twishimirako ibirori nk'ibi byabereye mu karere ka Rutsiro. Ati: "Umuganura ni ikimenyetso cy'ubumwe n'Ubudaheranwa by'abanyarwanda. Umuganura ni umuco watumaga abahuye n'ibibazo bumvako batari bonyine. Umuganura ufite akamaro; utwibutsako tugomba gukunda umurimo. Tukishimira Ibyo twagezeho n'ibyo tutagezeho tugashakira hamwe ingamba zo kubigeraho."

Muri ibi birori, abaturage ba Rutsiro haganujwe Inka, imbuto n'abana bahabwa amata. Imirenge, utugari, imidugudu n'imiryango yahize abandi mu kwesa Imihigo bahawe ibihembo bitandukanye kuva ku magare yahawe imiryango kugera ku bikombe bayahawe imirenge.

Minisitiri, Dr Ildephonse, yagarutse ku ntego y'umuganura no ku kamaro kawo agira ati: " Umuganura ufite Intego yo kunga ubumwe bw'Abanyarwanda ugahuza n'amahamwe ya Guverinoma ari yo ubumwe, ubupfura n'umurimo. Umuganura kandi ni inzira yo gufashanya no gutabarana."

Ibirori byasojwe n'ubusabane bw'abayobozi n'abaturage bitabiriye.