Uyu munsi tariki ya 28 Gicurasi 2025, ku biro by'Akarere, Umuyobozi w'Akarere Wungirije Ushinzwe iterambere ry'Ubukungu Bwana Uwizeyimana Emmanuel yakiriye itsinda ry'Abadepite rigizwe na Hon. Ayinkamiye Spéciose, ari na we uriyoboye, Hon. Marie Thérèse Uwubutatu na Hon. Jean Paul Munyandamutsa.

Aba badepite yabakiriye mu nama yitabiriwe n’abayobozi b’inzego z’umutekano mu Karere, Abayobozi b’amashami mu karere n’abanyamabanga nshingwabikorwa b’Imirenge igize Akarere n’abahagarariye inzego zitandukanye: Inama Njyanama, Urubyiruko n’abagore. Aba badepite baramara iminsi igera kuri 7 mu karere aho bazataha tariki 03 Kamena 2025.

Impamvu y’uruzinduko rw’aba badepite nk’uko byasobanuwe na Hon. Ayinkamiye Spéciose ni ukureba uburyo abaturage bahabwa serivisi mu nzego zegerejwe abaturage harimo no kugenzura uburyo abaturage bitabira serivisi z’ikoranabuhanga nk’irembo n’ubundi buryo bwashyizweho. Ibi bikaba bikorwa binyuze mu nshingano y’Inteko Ishingamategeko yo gukurikirana no kugenzura ishyirwa mu bikorwa rya gahunda za Guverinoma. Abadepite bagaragaje ko uru rugendo ruba rugamije kurebera hamwe ibibazo bihari n’uburyo byakemuka mu bufatanye bw’inzego zitandukanye.

Muri iyi nama, umuyobozi yagaragarije abadepite raporo y’ibibazo bitandukanye abaturage bagejeje ku badepite mu ngendo ziheruka bagiriye mu Karere. Hagaragajwe kandi uburyo abaturage bitabira serivisi z’ikoranabuhanga mu karere n’imbogamizi zikigaragara.

Abadepite bishimiye uburyo Akarere kakurikiranye ibibazo by’abaturage bashishikariza ubuyobozi gukomeza gushyiramo imbaraga n’ibitarakemuka bikazakemuka mu gihe gikwiye no mu buryo bunoze. Hon. Ayinkamiye yagize ati: “…turabashima uburyo muri kugenda mukemura ibibazo by’abaturage cyane cyane mu bufatanye n’inzego zitandukanye harimo RTDA, WASAC, RDB na REG mu byerekeranye n’ingurane z’abaturage ariko tunagira ngo tubasabe Nyakubahwa Visi Meya ko ibibareba mubikemura; mukomeza kwegera abaturage ibireba imirenge bakabikemura kugeza ku Mudugudu ku buryo abaturage badakomeza kugira umuzigo w’ibibazo…”