Abadepite Nyabyenda Damien, Tumukunde Aimee Marie Ange na Venuste Icyitegetse batangiye uruzinduko rw’akazi mu Karere ka Rutsiro, ruzasozwa tariki ya 03 Kamena 2026. Bakiriwe n’Umuyobozi w’Akarere, Madamu Kayitesi Dative, mu nama yabahuje n’abahagarariye ibyiciro bitandukanye bikora mu rwego rw’ubuhinzi.

Uru ruzinduko rugamije kuganira n’abaturage n’abafatanyabikorwa ku bikorwa n’imishinga biteza imbere ubukungu n’imibereho myiza y’abaturage, gusura ibikorwa by’ubuhinzi ndetse no kureba uburyo Akarere gakomeza kongera umusaruro ukomoka ku buhinzi mu Mirenge 8 kuri 13 igize Akarere.

Ku biro by’Akarere, Madamu Kayitesi Dative yagejeje ku badepite raporo igaragaza uburyo Akarere kakurikiranye kandi kagakemura ibibazo abaturage babajije Abadepite mu ruzinduko ruheruka. Yanatanze kandi raporo ku rwego rw’ubuhinzi mu Karere, hibandwa ku bihingwa ngandurarugo n’ibihingwa ngengabukungu mu myaka y’ihinga ya 2023–2024, 2024–2025 na 2025–2026.

Muri iyo nama hagaragajwe zimwe mu mbogamizi zibangamiye iterambere ry’ubuhinzi zirimo imihindagurikire y’ikirere, ingengo y’imari idahagije yo kunganira abahinzi kubona inyongeramusaruro zirimo imbuto, ifumbire n’ishwagara, ubushobozi buke bw’abahinzi bwo kwigurira inyongeramusaruro ndetse n’ikibazo cy’ibiti bya kawa bishaje bitakibyara umusaruro ushimishije.

Nyuma y’inama, Abadepite basuye uruganda rw’icyayi rwa Rutsiro bari kumwe na na Madamu Kayitesi Dative. Basobanuriwe uruhare urwo ruganda rugira mu guteza imbere imibereho y’abaturage binyuze mu gutanga akazi no gushyigikira gahunda za Leta zigamije kuzamura imibereho myiza y’abaturage. Abadepite bashimiye ubuyobozi bw’uruganda ku ruhare rugira mu iterambere ry’Akarere n’iry’igihugu muri rusange.

Mu rwego rwo kwegera abaturage, Abadepite banasuye abaturage bo mu Murenge wa Manihira, Akagari ka Muyira, aho baganiriye ku buryo bwo kongera umusaruro binyuze mu guhinga kijyambere no gukoresha neza inyongeramusaruro. Abaturage bashishikarijwe kwihaza mu biribwa no gusagurira amasoko.

Bagarutse kandi ku kamaro k’isuku haba iy’umubiri, iy’aho batuye ndetse no mu bikorwa bya buri munsi, basaba abaturage gukomeza kwimakaza umuco w’isuku kugira ngo birinde indwara kandi bateze imbere imibereho yabo.

Abadepite banaganirije abaturage ku bumwe n’ubudaheranwa bw’Abanyarwanda, bibutsa amateka mabi igihugu cyanyuzemo yaranzwe n’ivangura ryagejeje kuri Jenoside yakorewe Abatutsi. Basabye abaturage gukomeza kurwanya ingengabitekerezo ya Jenoside no kwigisha abana amateka nyayo y’u Rwanda kugira ngo ibyabaye bitazongera ukundi.

Uru ruzinduko ruzakomeza mu yindi Mirenge y’Akarere, aho Abadepite bazasura ibikorwa bitandukanye by’iterambere ndetse bakaganira n’abaturage ku bibazo bibangamiye imibereho yabo n’ingamba zo kubikemura.