Kuri uyu wa 24 Kamena 2025, mu Murenge wa Gihango habereye imurikabikorwa ryatangijwe n’umuyobozi w’Akarere Wungirije ushinzwe ubukungu n’iterambere, Bwana UWIZEYIMANA Emmanuel  afatanyije n’umuyobozi  w’abafatanyabikorwa  (Joint Action for Development Forum),  Bwana NTEZIRYAYO  Aaron.

Mu gutangiza imurikabikorwa, Bwana  UWIZEYIMANA Emmanuel  yagaragaje ko  iki gikorwa kigamije guteza imbere no kumenyekanisha ibikorwa by’abafatanyabikorwa.  Yagize ati: “dukwiriye gukoresha amahirwe dufite mu kugaragaza ibikorwa biri mu Karere kacu. Twese hamwe dukwiriye guhanga udushya, kwigiranaho, kugaragaza ibikorwa byacu, tukagura ndetse tukanagurisha ibyo twagezeho.” 

Umuyobozi wa Joint Action for Development Forum (JADF)  yashimiye ubuyobozi  bw’Akarere kubashyigikira mu bikorwa bakora no kubaha umwanya wo kugaragaza ibikorwa. Yagize ati: “uyu ni umwanya mwiza nk’abafatanyabikorwa  kugaragaza ibikorwa byacu no gushakira isoko ibyo dukora. Turahari ngo dushyire imbaraga mu byo dukora bya buri munsi ndetse tunongere ibikorwa byiza bizadufasha kugera ku bukungu n’iterambere rirambye.” 

Iki gikorwa kitabiriwe n’inzego zitandukanye yaba inzego za Leta ndetse n’abafatanyabikorwa hagamijwe kugaragaza ibikorwa binyuranye bikorerwa mu Karere. Imurikabikorwa n’umwanya mwiza aho abaturage, abikorera, abakerarugendo n’abandi bose bashobora kumenya ibikorerwa mu Karere.