Uyu munsi tariki ya 7 Werurwe 2025, itsinda riyobowe na Hon. Mureshyankwano Marie Rose bari mu ihuriro ry'abanyarwandakazi bari mu nteko ishingamategeko (FFRP) basuye Akarere ka Rutsiro mu rwego rwo kwifatanya n'Akarere mu kwizihiza umunsi mpuzamahanga w'umugore uba tariki ya 08 Werurwe buri mwaka. 

Abagize itsinda Hon. Senateri Mureshyankwano Marie Rose, Hon. Depite Uwiringiyimana Philbert na Hon. Depite Izere Ingrid Parfaite bakiriwe n'Umuyobozi w'Akarere Wungirije ushinzwe iterambere ry'ubukungu Bwana Uwizeyimana Emmanuel ari kumwe na Perezida w'Inama Njyanama y'Akarere Bwana Matabaro Bernard. 

Abagize itsinda baganiye n'abayobozi b'inzego zinyuranye mu Karere harimo inama Njyanama y'Akarere, abanyamabanga nshingwabikorwa b'imirenge, abahagarariye inama z'igihugu abagore n'urubyiruko, abahagarariye amadini n'abahagarariye inzego z'umutekano.

Ibiganiro byibanze ku gushaka ibisubizo bikumira amakimbirane mu muryango haharanirwa umuryango utekanye, uteye imbere n'uruhare rw'umugore muri uru rugendo. 

Umuyobozi w'Akarere Wungirije ushinzwe imibereho myiza y'abaturage Madamu Umuganwa Marie Chantal yagaragarije abitabiriye uburyo ikibazo cy'amakimbirane gihagaze mu Karere, ikibitera n'ingamba zihari mu kugikumira no kugabanya amakimbirane akigaragara n'ibindi. 

Bimwe mu bitera amakimbirane mu miryango harimo gusesagura imitungo, ubuharike n'ubusambanyi, ubusinzi n'ibindi. Mu ngamba harimo kuganiriza imiryango ibana mu makimbirane yigishwa ku myitwarire ikwiye umuryango ihuzwa n'ibiganiro mu bwubahane n'ubwizuzanye.

Madamu Umuganwa Marie Chantal yagaragaje ko Akarere kazirikana uruhare rw'umuryango mu iterambere ry'Akarere. Ati: "tuzakora ibishoka nk'Akarere ngo tugere ku muryango ushoboye kandi utekanye. Umuryango ni wo shingiro ry'iterambere." 

Hon. Senateri Mureshyankwano yagarutse ku ruhare rwa buri wese mu kugira umuryango utekanye kandi mu bwuzuzanye. Ati: "biradusaba ko twese dushyira hamwe kugira ngo tugire umuryango utekanye. Umugore ntiyabaho umugabo adahari!" 

Nyuma yo kuganira no kungurana ibitekerezo ku cyatuma umuryango utekana kandi ugatera imbere, abashyitsi basuye imirenge ya Mushubati, Musasa, Ruhango na Kivumu hagamijwe kuganira n'imiryango iba mu makimbirane n'iyayavuyemo. 

Umunsi mpuzamahanga w'umugore mu Karere ka Rutsiro uzizihirizwa mu murenge wa Musasa, Akagari ka Nyarubuye.