Umuyobozi w'Agateganyo w'Akarere ka Rutsiro Bwana Mulindwa Prosper yakiriye itsinda ry'abasenateri rigizwe na Hon.  Dusingizemungu Jean Pierre na Hon. Evode Uwizeyimana.

Aba basenateri babarizwa muri Komisiyo ya Sena y'Ububanyi n'amahanga, ubutwererane n'umutekano bari mu ruzinduko rw'akazi mu gihugu hose rugamije kugenzura ishyirwa mu bikorwa ry’amasezerano y’umuryango w’abibumbye yerekeye imihindagurikire y’ibihe yashyiriweho umukono i Rio de Janeiro mu gihugu cya Brezil, ku wa 5 Kamena 1992.

Akarere kakaba kagaragarije aba basenateri ibikorwa bitandukanye biri mu karere bigamije guhangana n’imihindagurikire yibihe harimo gutera ibiti, kubungabunga inkengero z’imigezi, kurwanya isuri hacibwa amaterasi n’ibindi.

Akarere kandi kagaragaje imbogamizi zo kurengera ibidukikije harimo ubumenyi bw'abaturage bwo kurengera ibidukikije bukiri buke mu gihe ari bo musingi w'iterambere.

Aba basenateri bakaba bagiriye inama ubuyobozi bw’akarere gushyira ho gahunda igamije gushyira mu bikorwa ingamba igihugu cyiba cyashyizeho. Sen Evode yagize ati: “Ikibazo cyo kubungabunga ibidukikije n'icy'isi yose. Ntabwo Akarere ka byishoboza konyine. Ahubwo gakwiye kuba gafite gahunda ihamye yo gushyira mu bikorwa ingamba Igihugu kiba cyarashyizeho. Gakwiye kugira kandi uburyo imishinga igamije kurengera ibidukikije ishyirwa mu bikorwa n'imicungire yayo ku buryo burambye.”

Nyuma yo kuganira n'abayobozi banyuranye ku rwego rw'Akarere ku biri gukorwa n'ibikwiye gukorwa mu kubungabunga ibidukikije, baherekejwe na  Bwana Mulindwa, Abasenateri Hon. Dusingizemungu Jean Pierre na Hon. Evode Uwizeyimana basuye Uruganda rw'icyayi rwa Rutsiro hagamijwe kureba uburyo Uruganda rwubahiriza ihame ryo kurengera ibidukikije.

Aba bashyitsi bakaba bashimye uburyo uruganda rugerageza gukora ariko rurengera ibidukikije ariko banasaba ko hakomeza gushyiraho igamba zigamije kugabanya kwangiza amashyamba bayashakamo inkwi.

Sen. Prof. Dusingizemungu yagize ati: “ ntidukwiye gukomeza gutereza ko inkwi arizo gisubizo cyonyine mu gihe hatunganywa icyayi. Ni ngombwa ko dusha ubundi buryo bwo kurengera amashyamba dushaka igisumbura ikoreshwa ry’inkwi mu nganda.”