Uyu munsi tariki ya 09/06/2025, abasenateri babarizwa muri Komisiyo y'Imibereho myiza Umuhire Adrie, ari na we Muyobozi w'iyi Komisiyo,  na Twahirwa André bagiriye uruzinduko mu Karere rw'iminsi 2 hagamijwe kureba imibereho y'abaturage batuye ku birwa ahasuwe ikirwa cya Bugarura.

 Aba basenateri bakiriwe  n’Umuyobozi w'Akarere Wungirije ushinzwe iterambere ry’ubukungu Bwana Uwizeyimana Emmanuel ari kumwe n'Umuyobozi w'Akarere Wungirije ushinzwe imibereho myiza y'abaturage Madamu Umuganwa Marie Chantal, inzego z’umutekano n'abaturage batuye ikirwa cya Bugarura.

Nyuma yo kwakirwa ku kirwa cya Bugarura, abasenateri n’abayobozi bagiranye inama n’abatuye  kuri iki kirwa baganira kuri gahunda z’urugendo rw’abasenateri. 

Nk'uko byasobanuwe na Hon. Umuhire Adrie, uru ruzinduko rwateguwe mu rwego rwo kugenzura imibereho y'abaturage batuye ku birwa hagamijwe kureba niba aba baturage bahabwa amahirwe angana n'abatuye ku butaka bugari. Harebwa niba aba baturage bafite amashuri, amavuriro, imihanda, amashanyarazi n'ibindi. Muri rusange, kureba niba abaturage bahabwa serivisi zikwiye nk'abandi baturage bose.

Nyuma yo kuganira n'abaturage ku ngingo zinyuranye harimo isuku, gahunda ya kora wigire, kujyana abana ku ishuri, kuringaniza urubyaro, kurwanya amakimbirane mu ngo n’izindi, abasenateri basuye ibikorwa remezo byegerejwe abaturage n'ibikorwa by'iterambere biri ku kirwa. Hasuwe ikigo cy'ishuri cya Bugarura, ivuriro rya Bugarura, amashanyarazi n'ibikorwa by'abaturage. Abasenateri bashimye uburyo abaturage babayeho gusa bagaragarizwa ikibazo cy'amazi meza atagera ku kirwa uko bikwiye.

Hon. Sen. Umuhire Adrie yagize ati: abaturage bagomba gukora bakigira ntibategereze ko ibintu byose bazabikorerwa na Leta. Yabibukije ko Leta yashyizeho gahunda zitandukanye zigamije guteza imbere abaturage harimo Gira inka, kubakira abatishoboye, n'izindi abasaba kuzibyaza amahirwe.”

Abasenateri kandi bagize umwanya wo kuganiriza abaturage ku nshingano z’umutwe wa Sena harimo kwita ku mahame remezo, kugenzura ibikorwa bya Guverinoma, kugira inama Guverinoma ku byemezo bikomeye mu gihugu, kwemeza ishyirwa mu myanya ry'abayobozi batandukanye bateganywa n'itegeko nshinga no gutora amategeko. 

Ku munsi wa 2, abasenateri bakomeje uruzinduko rwabo mu Karere  bagirana inama n'abayobozi b'amashami atandukanye n'abayobozi b'inzego z'umutekano mu Karere.

Muri iyi nama haragarutswe ku byagaragaye ku mibereho y'abatuye ikirwa n'icyakorwa kugira ngo imibereho yabo irusheho kuba myiza. Abasenateri bashimye uko basanze abatuye Bugarura babayeho basezeranya ubuvugizi kugira ngo ibitarakorwa na byo bibe byakorwa.

 Ikirwa cya Bugarura gituwe n’abaturage 2,362 mu ngo 442 zigize Imidugudu ibiri mu Kagari Kabushaka.