Uyu munsi tariki ya 30 Ukwakira 2025, ku biro by’Akarere ka Rutsiro habereye inama yateguwe hagamijwe kugaragaza aho igishushanyombonera cy’imikoreshereze y’ubutaka kigeze gitegurwa, ku bufatanye bwa sosiyete AJ+ Partners n’Akarere, ku nkunga y’umushinga Global Green Growth Institute (GGGI).

Iyi nama yitabiriwe n’abashoramari bakorera mu Karere, inzego zishinzwe igenamigambi, abashinzwe ubutaka ku rwego rw’Akarere n’Imirenge, n’abandi bafatanyabikorwa mu iterambere. Yari igamije gusangira ibitekerezo no kungurana inama ku buryo igishushanyombonera cyubahiriza inyungu z’abaturage n’abikorera, kikaba kijyanye n’icyerekezo cy’igihugu mu gukoresha ubutaka neza no kurengera ibidukikije.

Mu izina ry’Ikigo cy’Igihugu Gishinzwe Imikoreshereze y’Ubutaka, Igenamigambi ry’Imijyi no Gutunganya Site zitandukanye (NLA), Rungano Didier yashimye uburyo Akarere ka Rutsiro kari gufatanya n’inzego zitandukanye mu gutegura iki gishushanyombonera, ashimangira ko kizafasha mu gutegura iterambere rishingiye ku igenamigambi ryiza ry’ubutaka no kwirinda imikoreshereze idateganyijwe.

Uhagarariye GGGI, Ndicunguye Richard, yavuze ko uyu mushinga uzafasha gushyira imbaraga mu iterambere rirambye ry’Akarere, hashingiwe ku gukoresha ubutaka mu buryo buboneye kandi buhuje n’icyerekezo cya Green Growth.

Uhagarariye AJ+ Partners yasobanuye ko imidugudu 88 ari yo izaba igize igishushanyombonera gishya cy’Akarere, kikazita ku mibereho myiza y’abaturage, ibikorwa remezo, n’ibikorwa by’ishoramari.

Abitabiriye inama basabwe gukomeza kugira uruhare mu gutanga ibitekerezo kugira ngo igishushanyombonera kizabe igikoresho nyacyo cyo guteza imbere Akarere ka Rutsiro mu buryo burambye.

 

Iyi nama yayobowe na Perezida w’Inama Njyanama Bwana Matabaro Bernard ari kumwe n’Umunyabanga Nshingwabikorwa w’Akarere Bwana Bagirishya Pierre Claver.