Ku wa Kane, tariki ya 16 Ukwakira 2025, mu karere ka Rutsiro habaye inama mpuzabikorwa yahuje abayobozi 605 kuva ku rwego rw’Umudugudu kugeza ku rwego rw’Akarere. Inama yayobowe na Madamu Kayitesi Dative, Umuyobozi w’Akarere, hagamijwe gusuzuma imikorere y’inzego z’ibanze no kongera imbaraga mu guha abaturage serivisi zinoze.

Madamu Kayitesi yibukije abayobozi ko bagomba kuba intangarugero mu mitangire ya serivisi, birinda imikorere mibi ishobora kudindiza iterambere ry’abaturage. Yagize ati: “Ubuyobozi ni ugukorera abaturage. Icyo tubatezeho ni ukuri, ubupfura, ubunyangamugayo no guharanira icyatuma umuturage atera imbere.”

Bwana Uwizeyimana Emmanuel, Umuyobozi w’Akarere Wungirije Ushinzwe Iterambere ry’Ubukungu, yagrutse ku mitangire ya serivisi mu nzego z’ibanze. Yagaragaje ko hari aho bigaragara ko abaturage bagicikanwa na serivisi cyangwa bagahura n’imbogamizi zirimo ruswa, akarengane, cyangwa gucuragizwa. Yasabye abayobozi kwirinda ayo makosa, bagakorera mu mucyo no mu nyungu rusange.

Mu yindi ngingo yaganiriweho, Bwana Bagirishya Pierre Claver, Umunyamabanga Nshingwabikorwa w’Akarere, yasobanuriye abitabiriye inama imikorere ya STAP ((Syndicat de Travailleur de l’Administration Publique), Sendika y’abakozi ba Leta). Yibukije ko ari urubuga rwo guteza imbere imibereho myiza y’abakozi no guteza imbere umurimo ubereye abaturage. Hanatowe Komite nshya ya STAP ku rwego rw’Akarere, iyobowe na Bwana Ndayambaje Emmanuel.

Madamu Kayitesi yibukije kandi gahunda y’ukwezi k’ubumwe n’ubudaheranwa, asaba abayobozi gukomeza kwegera abaturage no kubaganiriza ku kamaro ko gusigasira ubumwe bw’Abanyarwanda. Yabasabye gukomeza ubukangurambaga bugamije kwirinda ingengabitekerezo ya Jenoside no gukumira ikintu cyose cyazana amacakubiri mu banyarwanda.

Madamu Kayitesi yakomeje asaba abayobozi kwita ku ishyirwa mu bikorwa ry’imihigo asaba ko hashyirwa imbaraga mu mihigo y’ingo, buri muturage akaba afite ikayi y’imihigo ye, ifasha umuryango kwiteza imbere.

Yibukije abayobozi kandi ko bakwiye kugira uruhare mu kurinda urubyiruko ingeso mbi, cyane cyane izishingiye ku biyobyabwenge, inzoga z’inkorano, n’indi myitwarire yangiza ejo hazaza h’igihugu. Kuri iyi ngingo, yabasabye ko bakwiye kugenzura imikorere y’utubari hagenzurwa ko hubahirizwa amabwiriza atugenga.

Abitabiriye basangiye ibitekerezo, biyemeza ko bagiye guhsyira mu bikorwa imyanzuro yashwe mu buryo buhamye.