Mu mpera z’iki cyumweru ku wa 17 na 18 Gicurasi 2025, kuri Paruwasi ya Congo-Nil habereye amahugurwa agamije gufasha abana bose kwitabira ishuri no kurigumamo. Amahugurwa yahawe abayobozi bashinzwe uburezi mu Mirenge n’abayobozi b’ibigo by’amashuri bahagarariye abandi ku bufatanye n’Umuryango wita ku kurengera Umwana (Save the Children International) binyuze mu mushinga ugamije ko nta mwana n’umwe uta ishuri (Zero Out of School Children). 

Umushinga wa Zero Out of School Children wari uhagarariwe na Madamu Uwamahoro Valentine mu gihe aya mahugurwa yafunguwe n’Umuyobozi w’Akarere Wungirije Ushinzwe imibereho myiza y’abaturage Madumu Umuganwa Marie Chantal. 

Abahawe amahugurwa akaba ari abayobozi bazahugura abandi mu karere hose. Amahugurwa yibanze ku nshingano z’ibyiciro bitandukanye bifite uruhare rukomeye mu gutuma nta mwana utajya ku ishuri cyangwa ngo arivemo barimo abayobozi b’ibigo by’amashuri, incuti z’umuryango n’urubyiruko rw’abakorerabushake. Madamu Umuganwa Marie Chantal yasabye abitabiriye kubyaza ubumenyi bahawe umusaruro bashyira mu bikorwa inshingano zabo uko bikwiye.

Uwamahoro Valentina akaba yizeza ko aya mahugurwa azagira akamaro gakomeye mu kunoza imikoranire y’inzego zitandukanye mu   kujyana abana ku ishuri. Yagize ati: “ ..aba bayobozi bahuguwe bagiye guhugura abandi ku rwego rw’ Umurenge. Hagiye guhugurwa komite z’ababyeyi ku rwego rw’ishuri, incuti z’umuryango n’urubyiruko rw’abakorerabushake ruhagarariye abandi mu tugari. Aya mahugurwa azazana impinduka mu karere kacu ka Rutsiro aho abana bose batiga bari inyuma y’ishuri, abarivuyemo n’abatarigeze batangizwa, tugiye gukora ku buryo abo bana bose bagaragara bakajyanwa mu ishuri ndetse hakaba ubufatanye ku buryo abo bana bajyanywe mu ishuri barigumamo twese inzego dufatanyije.”

Yakomeje kandi agaragaza ko hatekerejwe no ku gusesengura impamvu zitandukanye zituma umwana ashobora guta ishuri na zo zikazitabwaho. Twavuga nk’ubukene, uburangare bw’ababyeyi se cyangwa izindi.

Abahuguwe bagaragaje ko aya mahugurwa agiye kubafasha kunoza imikoranire hagati yabo no kwita ku ruhare rwabo uko bikwiye nk’uko babisobanuriwe. Bagaragaje kandi ko bagiye kubikora kinyamwuga nta guhutaza umwana cyangwa umubyeyi. Kubera kudasobanukirwa n’inshingano za buri cyiciro neza, byagiraga ingaruka zo gutuma buri cyiciro kidashyira mu bikorwa neza inshingano zabo.

Kugeza ubu, mu karere ka Rutsiro habarurwa abana 451 bataye ishuri aho Akarere gakomeje urugamba rwo kubagarura mu ishuri ku bufatanye n’ibyiciro bitandukanye.