Kuri uyu wa Gatatu tariki ya 16 Mata 2025, Akarere ka Rutsiro kakiriye by’agateganyo ikusanyirizo ry’umusaruro w’amafi mato (isambaza) ukomoka mu kiyaga cya Kivu. Iri kusanyirizo ryubatswe ku bufatanye bw’Akarere n’Umuryango wa ARCOS binyuze mu mushinga wa “Living Lakes.”

Akarere ka Rutsiro kari gahagarariwe n’Umuyobozi w’Akarere Wungirije Ushinzwe itrambere ry’ubukungu Bwana Uwizeyimana Emmanuel. ARCOS yari ihagarariwe na Bwana Hategekimana Aimable, Umuyobozi w’ibikorwa mu muryango wa ARCOS. Uyu muhango witabiriwe kandi n’abaturage bafite aho bahuriye n’umusaruro w’isambaza harimo abarobyi n’abacuruzi.

Iri kusanyirizo ryubatswe mu Murenge wa Musasa, Akagari ka Gabiro mu Mudugudu wa Nyarugenge ryitezweho gukuraho igihombo cy'umusaruro wangirikaga bitewe no kutabona uburyo bwo kuwitaho uko bikwiye. Iri kusanyirizo rifite igice cyo kwanikaho umusaruro mu gihe hategerejwe ko woherezwa ku isoko n'aho kuwubika mu gihe waba wabaye mwinshi. 

Bwana Uwizeyimana yasabye abazakoresha iki gikorwa remezo kucyitaho uko bikwiye. Yashimiye Umuryango wa ARCOS ku ruhare rukomeye ugaragaza mu guteza imbere umuturage wa Rutsiro. Yasezeranyije ARCOS ko Ubuyobozi buzakomeza kugenzura ko iri kusanyirizo rikora kandi rifashwe neza uko bikwiye.

Bwana Uwizeyimana yibukije abakorera ku kiyaga cya Kivu gukaza ingamba zo kwirinda indwara ziterwa n'amazi yanduye. Muri izo ndwara harimo Cholera, Diarrhea, n'izindi. Yasabye abaturage muri rusange kugira isuku bakagira ubwiherero bumeze neza, bupfundikiye kandi bukinze.

Aimable wari uhagarariye ARCOS yasabye abaturage kuzirikana ubushake Ubuyobozi bufite bwo gushakira umuturage iterambere bagafata neza igikorwa cyagezweho. Yabasabye kandi gukomeza kugaragaza uruhare rwabo mu kubungabunga urusobe rw’ibinyabuzima biri mu kiyaga cya Kivu birinda kugitamo imyanda.”

Iri kusanyirizo rikaba rizafasha mu kongera ubuziranenge bw'umusaruro bagaca ukubiri no kumukiriza isambaza mu ngo zabo ku buryo butandukanye byatumaga ubuziranenge bitanoga.

Abakora umwuga w'uburobyi kimwe n'abacuruza isambaza bishimiye iki gikorwa-remezo bizeza ubuyobozi kuzagifata neza no kubyabyaza umusaruro mu buryo bwizewe. 

Madamu Mukabideri Bonifride, mu ijwi rya bagenzi be bacuruza isambaza, yagize ati: “ni ukuri turashima Leta y’uRwanda iharanira iterambere ry’umuturage n’imibereho myiza. Iyo imvura yagwaga twaburagaa aho twugama ndetse n’umusaruro ukangirika. Ariko ubu ntituzongera guhangayikishwa n’iki kibazo. Ubu tugiye kubahiriza isuku n’amabwiriza ubuyobozi bwaduhaye ku buryo ducuruza isambaza nziza zizira inenge.”