Uyu munsi tariki ya 04 Nyakanga 2025, Akarere ka Rutsiro kifatanyije n'Igihugu muri rusange mu kwizihiza isabukuru yo KWIBOHORA.

By'umwihariko mu Karere umunsi wizihirijwe ku rwego rw'Umudugudu aho ku rwego rw'Akarere, wizihirijwe mu murenge wa Musasa, mu Mudugudu wa Nyarugenge, Akagari ka Gabiro, Umushyitsi Mukuru ari Umunyamabanga Nshingwabikorwa w'Intara y'Iburengerazuba Madamu Umuganwa Marie Florence.

Nk'uko byateganyijwe kuri gahunda harimo no kwidagadura hishimirwa ibikorwa Igihugu kimaze kugeraho, ibirori byabimburiwe n'umukino w'ibare wakinywe na ba Mutimawurugo n'umupira w'amaguru wakinnywe hagati y'abakuru b'Imidugudu na ba Mutwarasibo hazirikanwa insanganyamatsiko igira it: "KWIBOHORA, Intambwe mu Ntego."

Abayobozi n'abaturage bakurikiye umupira w'amaguru wahuje Abakuru b'Imidugudu na ba Mutwarasibo. Mu gihe abajyanama b'ubuzima batsinzwe n'abajyanama b'iterambere ba Mutimawurugo mu mukino w'ibare wabahuje, ba Mutwarasibo batsinze Abakuru b'Imidugudu ibitego 3-0.

Umuyobozi w'Akarere Wungirije ushinzwe iterambere ry'ubukungu Bwana Uwizeyimana Emmanuel yahaye ikaze abitabiriye ibirori byo KWIBOHORA ku nshuro ya 31 aho yagaragaje ibikorwa by'iterambere Akarere kamaze kugeraho harimo inganda z'icyayi n'iza Kawa, imihanda inyuranye, amazi meza n'amashanyarazi aho mu Karere abaturage bacanirwa ku kigero cya 75%.

Hakizimana Damascène, umuturage wo mu murenge wa Musasa, yatanze ubuhamya ku iterambere imiyoborere myiza yagejeje ku baturage aho yamufashije kwikura mu bukene. Yagize ati: "nta muturage ukwiye kuvuga ko aho atuye hatera! Hera mu bwonko!"

Muri ibi birori kandi, hafashijwe abaturage kwiteza mu bikorwa bibateza imbere aho Sibomana Daniel na sibomana Steven, bahawe Inka na Nyirabakene Bonifride, umukecuru ugeze mu myaka murongo 60, yashyikirijwe inzu yubakiwe, ahabwa ibiryamirwa n'ibiribwa byo kuyitahanamo aho yari amaze igehe abayeho asembera.

Umunyamabanga Nshingwabikorwa w'Intara Madamu Uwambajemariya Florence, yagize ati: "Kwibohora nyakubri bivuzeko umuturage abaho neza, abana bakajya mu ishuri, bakabaho bazira imirire mibi. Ahari ubufatanye byose birashoboka. Dukomeze twese gufatanya tugere kuri byinshi twifuza kugeraho."

Hashimiwe kandi Ingabo z'Igihugu cyane cyane izahoze ari iza RPA n'Umukuru w'Iguhugu bagize uruhare rukomeye n'ubwitange budasanzwe mu kubohora uRwanda, bakagarurira abanyarwanda ikizere cyo kubaho, bakaba umutekano wuje ituze.

Ibirori byo kwizihiza isabukuru yo Kwibohora ku nshuro ya 31 bikaba byarabanjirijwe n'igikorwa cyo gutaha ibikorwa bitanduakanye aho mu karere ka Rutsiro hatashywe ibiraro 3 byubatswe muri gahunda y'ingabo na polisi by'Igihugu yo gufatanya n'abaturage mu iterambere ryabo (Security Organs Citizens Outreach Program).

Ibiraro byatashywe, 2 biherereye mu murenge wa Murunda mu kagri ka Rugeyo mu gihe 1 giherereye mu murenge wa Mushubati Akagari ka Bumba.