Uyu munsi tariki ya 1 Gashyantare 2024, mu karere ka Rutsiro hizihijwe umunsi w'Intwari z'Igihugu wabereye mu murenge wa Boneza, Akagari ka Bushaka ku rwego rw'Akarere. Ahandi mu karere wizihirijwe ku rwego rw'umudugudu. Uyu munsi witabiriwe n’Umuyobozi w’Akarere ka Rutsiro Madamu Kayitesi Dative, Umoyobozi w’Akarere Wungirije Ushinzwe Imbereho Myiza y’abaturage, Bgdr Gen. Rugambwa, abagize inama y’umutekano itaguye y’Akarere n’abaturage b’umurenge wa Boneza.

Ibi birori byabimburiwe n’umukino w'umupira w'amaguru wahuje abatuye ku kirwa cya Bugarura n'abatuye mu yindi midugudu igize Umurenge.

Nyuma y'umukino w'amaguru, byakomereje mu nzu mberabyombi y'ikigo cy'amashuri cya Kivu Hills Academy (KHA) giherereye mu Kagari ka Bushaka. Abaturage n'abayobozi bishimiye ibikorwa byaranze Intwari z'Igihugu uyu munsi Iterambere rikaba ryivugira.

Mu butumwa bwatanzwe, Bgdr Gen. Rugambwa yagarutse yagarutse ku nkomoko y’ubutwari bw’Abanyarwanda: "Dufite ubushobozi karemano bwo gutsinda abanzi bacu bose aho baba bava hose n'uko baba bangana kose kuko tubivoma ku bakurambare bacu. Amateka y'Abanyarwanda afite umuzi muremure. Atangira kera si ay'ejo bundi.”

Yakomeje asaba abaturage gukomera ku bumwe bw’Abanyarwanda: “ubumwe bwacu ni zo mbaraga zacu. Dushimire Intwari z'Igihugu zitanzeho ibitambo uyu munsi tukaba turi umwe. Iyo urebye URwanda rw'uyu munsi, ukareba Iterambere ryarwo, ukareba uburyo abanyarwanda twishimye, uravuga uti nubwo bagenzi banjye baguye ku rugamba na njye nkabikomerekerano ntabwo twaruhiye ubusa."

Mu ijambo rye, Madamu Kayitesi yibukije abaturage kurangwa n'indangagaciro ziranga intwari harimo ubwitange, urukundo rw'abatuye u Rwanda, kwigomwa inyungu zacu bwite duharanira inyungu rusange, guharanira kuba indashyikirwa mu byo dukora, kugira ubushishozi, kwita ku murimo unoze, kugira ubunyangamugayo, kugira umurava mu byo dukora bya buri munsi, kuba bandebereho ukaba intangarugero aho uri hose, kutavangura no kurangwa n'ubwubahane, kudatinya guhangana n'ikibi no kurangwa n'ikinyabupfura.

Yakomeje agira ati: “tugomba kwiyumvisha no kwiyemeza ko dukwiye gukomeza kunoza ibyo dushinzwe. Ibi bireba buri wese: yaba uwigisha, Umuhinzi, ukora isuku, ... ibyiciro byose.”

Uyu munsi ukaba wizihijwe hazirikanwa insinganyamatsiko igira iti: "ubutwari mu Banyarwanda, agaciro kacu!"