Mu gihe cy'iminsi ibiri, tariki ya 12 na 13 Gashyantare 2026, ku bufatanye na Collectif des Ligues et Associations de Défense des Droits de l’Homme (CLADHO) na Deutsche Gesellschaft für Internationale Zusammenarbeit (GIZ), mu Karere ka Rutsiro habaye amahugurwa agenewe Abajyanama b’Akarere, abagize Biro z’Inama Njyanama z’Imirenge, Biro ya JADF ku Karere, abahagarariye imiryango itari iya Leta, bamwe mu bakozi b'Akarere kuva ku rwego rw'Umurenge kugera ku Karere agamije kubongerera ubumenyi ku igenamigambi n’ingengo y’imari byita ku ihame ry’uburinganire n’iterambere ridaheza.

Aya mahugurwa yabereye mu cyumba cy'inama cy'Akarere hahugurwa abakozi b'Akarere ejo hashize no kuri Hoteli “Ubumwe” uyu munsi ubwo hahugurwaga ibindi byiciro. Aya mahugurwa yayobowe n'Umuyobozi w'Akarere Wungirije ushinzwe Iterambere ry’Ubukungu, Bwana Uwizeyimana Emmanuel, mu gihe amahugurwa nyirizina yatanzwe n’abahagarariye Minisiteri y'Imari n'Igenamigambi ry'Igihugu  (MINECOFIN) ndetse na CLADHO ku nkunga ya GIZ. 

Intego y'aya mahugurwa yari ugushimangira ubushobozi bw’abayobozi b’inzego z’ibanze kugira ngo bashobore kwinjiza neza ihame ry’uburinganire mu igenamigambi n’ingengo y’imari by’Akarere.

Mu mahugurwa, abitabiriye basobanuriwe ingingo z’ingenzi zigomba kwitabwaho mu gutegura gahunda z’iterambere no kugena ingengo y’imari mu buryo bwubahiriza uburinganire n’ubwuzuzanye. Hibanzwe ku kwinjiza ihame ry’uburinganire muri gahunda, politiki n’ingamba by’Akarere, kugira ngo ibikorwa bitegurwa bibashe gusubiza mu buryo buboneye ibibazo n’ibyifuzo by’abagabo n’abagore. Hanaganiriwe ku buryo bufatika bwo gutegura ingengo y’imari ishingiye ku buringanire, hagamijwe gukoresha umutungo wa Leta mu buryo bungana kandi bugira ingaruka nziza ku baturage bose.

Byongeye kandi, aya mahugurwa yashimangiye akamaro ko kwinjiza ihame ry’uburinganire mu itegurwa ry’Imihigo y’Akarere. Abitabiriye basabwe guhuza intego z’Akarere n’imihigo n’imiyoborere y’igihugu ku bijyanye n’uburinganire, no gukomeza gushyira ihame ry’uburinganire mu bikorwa byose by’Akarere nk’ingingo mbariro muri gahunda, ingamba n’ibipimo by’imikorere.

Umuryango wa CLADHO wari uhagarariwe na Bwana Evariste MURWANASHYAKA, Umuyobozi Ushinzwe guhuza ibikorwa bya CLADHO, Christine MUKANKUNDIYE, Umukozi wa MINECOFINE ushinzwe kwinjiza ihame ry'uburiganire mu ngengo y'imari mu gihe Léandre NDAYISHIMIYE yari ahagarariye GIZ.