Uyu munsi tariki ya 16 Ukwakira 2024, mu karere ka Rutsiro hateranye inama mpuzabikorwa y'Akarere iyobowe na Guverineri w'Intara y'Iburengerazuba Hon Dushimimana Lambert. Iyi nama iteganyijwe guterana inshuro 2 mu mwaka igahuza Abayobozi kuva ku mudugudu kugera ku karere aho abasaga 600 bitabiriye. 

Iyi nama ifite insanganyamatsiko igira iti: "Uruhare rw'Umuyobozi mu Iterambere rishyira Umuturage ku isonga"

Iyi nama yiga ingingo zitandukanye zirebana n'Iterambere ry'Umuturage haba mu bukungu no mu mibereho myiza no kumucungira umutekano.

Abitabiriye inama bahawe ikaze n'Umuyobozi w'Akarere Madamu Kayitesi Dative wagaragaje ishusho y'Akarere muri rusange mu bukungu, Imibereho myiza no mu mutekano. Madamu Kayitesi yagaragaje ibikorwaremezo biri n'ibigiye kubakwa mu karere harimo imihanda n'ibiraro, kwita ku burezi, gufasha abaturage kubona ubwisungane mu buvuzi, kubafasha kwitabira gahunda ya Ejo Heza, gufasha abaturage kubona ingurane ku mitungo yabo yakoreweho ibikorwa by'inyungu rusange n'izindi.

Mu mutekano, abitabiriye basabwe gukomeza kubumbatira ubumwe bw'Abanyarwanda, bagashishikariza abaturage gukomeza gukorana n'inzego z'umutekano uko bikwiye batangira amakuru ku gihe. Abayobozi basabwe gukomeza umuco wo gukunda Igihugu, bakagikorera kandi bakakitangira. Basabwe kwimana u Rwanda.

Muri iyi nama hakaba hahembwe ibyiciro bitandukanye by'abayobozi n'abaturage ku rwego rw'umuryango, umudugudu, Akagari n'umurenge kubera kwesa imihigo neza. Umuryango wahembwe ingorofani, isuka n'igitiyo mu rwego rwo kuyunganira mu gukomeza kwesa imihigo no kwiteza imbere mu bukungu. Umudugudu wahawe igare mu korohereza Umuyobozi w'Umudugudu kugera ku baturage vuba. Akagari n'imirenge bihabwa ibikombe mu kuzirikana umurava wabo mu kwesa imihigo. Hari n'abahawe amakamba nk'ishimwe ryo kutadohoka mu kwesa imihigo no gusigasira ibyagezweho.

Guverineri Hon. Dushimimana yibukiije  abayobozi kutagira umuhigo n'umwe bashyiramo imbaraga nke. Yabasabye gufata imihigo yose kimwe. Yibukije abagize inama y'inteko rusange ko ari bo nkingi ikomeye mu gutuma gahunda za Leta zigerwaho. Yagize ati: "mukwiye kwibuka ko ibyemezo bifatwa n'inzego zitandukanye, gahunda zishyirwaho na Leta, ari mwe mutuma zigerwaho. Murasabwa rero gukora neza uko bikwiye mugakemurira abaturage ibibazo byabo mutabogamye kandi mudatinze. Murasabwa gukorera abaturage icyo bagomba gukorerwa ntakubasiragiza abaturage."

Guverineri yibukije abayobozi ko ari indorerwamo umuturage avomamo uburyo yitwara, uburyo yitabira gahunda za Leta n'uburyo agira uruhare mu iterambere rye. Yagize ati: "ntabwo wabwira umuturage kwitabira gahunda za Leta na we utazirimo. Imyitwarire idahwitse y'umuyobozi ituma umuturage atitabira gahunda za Leta kubera ko atumva ibyo uwo muyobozi yamubwira."

Ikindi Guverineri yagarutseho ni ukugira uruhare mu guhindura imyumvire y'Abaturage. Yasabye abayobozi kwibutsa abaturage ko bagomba kugira uruhare mu kwivana mu bukene ariko n'abayobozi bakagira uruhare mu kubahuza n'amahirwe ahari.

Yakomeje ati: "Umuyobozi agakomba gukora ibyo ashoboye byose ku buryo umuturage amubona nk'umuyobozi. Abayobozi bakwiye kwirinda ko abaturage babacishamo ijisho kubera imyitwarire itajyanye n'Umuyobozi."

Guverineri Hon. Dusabimana yatangajeko ubuyobozi butazihanganira Umuyobozi utari muri uwo mwanya wo kuba Umuyobozi uko bikwiye. Abantu bagomba kubazwa ibyo bakora, baba bakoze nabi bakabiryozwa. Hon. Dushimimana akaba yanenze Abayobozi batsikamira abaturage.

Guverineri Hon. Dushimimana yasabye ubufatanye bw'inzego zitandukanye. Ati: "uruhare rwa buri wese ni ngombwa kugira ngo ibintu bihinduke. Gukorera hamwe ni byo bikemura ibibazo. Twese nidushyira hamwe, Abayobozi n'abafatanyabikorwa ibibazo byose tuzabikemura."