Ku bufatanye na Minisiteri y’Ubutegetsi bw’Igihugu, ku biro by’Akarere habereye amahugurwa y’iminsi ibiri kuri sisitemu ya Mbaza, urubuga rw’ikoranabuhanga rugamije gufasha abayobozi b’inzego z’ibanze kwakira, gukurikirana no gukemura ibibazo by’abaturage mu buryo bwihuse kandi buboneye. Aya mahugurwa yabereye ku biro by’Akarere, yitabirwa n’abayobozi batandukanye hagamijwe kubongerera ubumenyi ku mikorere y’iyi sisitemu nshya.

Umunsi wa mbere w’amahugurwa wabaye tariki ya 27 Mata 2026, ufungurwa na Bwana Uwizeyimana Emmanuel, Umuyobozi w’Akarere Wungurije Ushinzwe Iterambere ry’Ubukungu. Amahugurwa yakomeje tariki ya 28 Mata 2026 yitabirwa n’Umuyobozi w’Akarere, abanyamabanga nshingwabikorwa b’Imirenge n’Utugari, abashinzwe imibereho myiza mu Mirenge, abashinzwe ubutaka mu Mirenge hamwe n’abandi bakozi b’Akarere bashinzwe iterambere. Aya mahugurwa yateguwe hagamijwe gusobanurira abayobozi imikorere n’akamaro ka Mbaza ifite insanganyamatsiko igira iti: Guha imbaraga abaturage, Gushoboza inzego.

Sisitemu ya Mbaza izafasha inzego zitandukanye kwakira no gukurikirana ibibazo by’abaturage mu buryo bumwe kandi buboneye. Umuturage azajya ashobora gutanga ikibazo cye anyuze mu nzira zitandukanye. Buri kibazo kizahabwa nimero yihariye igikurikirana, izafasha umuturage n’ubuyobozi kumenya aho ikibazo kigeze gikemurwa.

Mu byiza iyi sisitemu ifite harimo gutanga ikibazo mu ibanga, gukurikirana aho ikibazo kigeze mu gihe nyacyo, gusubiramo uko ikibazo cyakemuwe no gutanga amanota ku rwego rwa serivisi yatanzwe. Izanahuzwa n’izindi gahunda z’ikoranabuhanga zirimo Irembo, bityo abaturage babashe gutanga ibibazo byabo aho bari hose bifashishije ikoranabuhanga.

Abayobozi b’Akarere bashimye iyi gahunda bavuga ko izafasha kurushaho gukorera mu mucyo, kunoza serivisi no kwegera abaturage. Intego nyamukuru ya Mbaza ni ugushimangira uruhare rw’umuturage mu bimukorerwa no gufasha inzego gutanga ibisubizo byihuse kandi byizewe hifashishijwe ikoranabuhanga.

Madamu Kayitesi yagize ati: “nk’abayobozi, dukwiye kwitabira gukoresha Mbaza kubera ko izadufasha gutanga serivisi zinoze kandi ikoroshya akazi. Ntabwo bikwiye ko umuyobozi arara atarebye muri sisitemu ya Mbaza ko hari ikibazo yagejejweho ngo arare atagikemuye!”