Uyu munsi tariki ya 13 Ukuboza 2024, kuri Hotel Ibigabiro ishami rya Rutsiro habereye inama igamije kurebera hamwe imibereho y'abarokotse Jenoside yakorewe Abatutsi 1994 n'ingamba zafatwa kugira ngo irusheho kumera neza. Hanagarutswe ku bufasha butandukanye bahabwa n'uburyo butangwamo.

Iyi nama yayobowe n'Umuyobozi w'Akarere Madamu Kayitesi Dative ihuza Minisiteri y'ubumwe bw'Abanyarwanda n'Inshingano mboneragihugu (Minubumwe), ikigo cy'igihugu gishinzwe ubuzima (RBC), Akarere, Ibuka n'izindi nzego zitandukanye kuva ku rwego rw'umurenge.

Uwera Kayumba Marie Alice, Umuyobozi Mukura (DG) w'Ishami ry'Ubumwe n'Ubudaheranwa  muri Minisiteri 'Ubumwe bw'Abanyarwanda n'Inshingano mboneragihugu ni we wari uyoboye itsinda ry'intumwa zaturutse mu nzego zitandukanye ku rwego rw'Igihugu.

Minubumwe ikaba yagaragarije abitabiriye inama ibikorwa bitandukanye bigamije ku kwita ku  batishoboye barokotse Jenoside yakorewe Abatutsi 1994 harimo ibijyanye n'ubuvuzi, kubona amacumbi no kubona inkunga y'igishoro cyangwa ibikoresho byo gutangiza umwuga ku bafite imbaraga zo gukora.

Umukozi wa RBC Anne Marie Bamukunde  yagarutse ku buzima bwo mu mutwe bw'abaturage barokotse Jenoside yakorewe Abatutsi 1994. Ikibazo cy'ubuzima bwo mu mutwe cyakomeje kuba imbogamizi ku mikoreshereze y'inkunga zihabwa abatishoboye barokotse Jenoside.

Nk'uko yabigarutse, bavugako umuntu afite ubuzima bwiza bwo mu mutwe mu gihe abanye neza n'abandi kandi na we ameze neza mu mitekereze n'imigirire ye. Indwara zijyanye n'ubzima bwo mu mutwe harimo  ihungabana, agahinda gakabije, n'izindi.

Mu kuzirinda harimo gusabana n'abandi, gukora siporo, kwirinda ibiyobyabwenge, kumva indirimbo zitandukanye n'ibindi bikorwa bifasha umuntu kutigunga.

Ihungabana rigaragazwa n'ubwoba bwinshi, guhunga cyane ibintu byibutsa amateka umuntu yanyuzemo n'ibindi.

Madamu Bamukunde yagaragajeko ihungabana  ritavuwe rishobora no kugera kubana. Yasabye ko umuturage ufite ikibazo dukwiye kumwegera tukamufasha.

Bagarutse kandi ku kibazo cy'ingengabitekero ya Jenoside kikigaragara hato na hato aho abitabiriye basabwe kugira uruhare mu kuyikumira no kuyigaragaza mu gihe gikwiye.

Ku ruhande rw'Akarere hitabiriye:

1. Komite Nyobozi y'Akarere, 
2. Abanyamabanga nshingwabikorwa b'imirenge
3. Abakozi bashinzwe imibereho myiza y'abaturage
4. Umukozi Ushinzwe ubuzima bwo mu mutwe mu mirenge hose
5. Abagize Komite Nyobozi ya Ibuka
6. Abagize Komite Nyobozi ya Avega
7. N'abahagarariye inzego z'umutekano

Inama yashojwe abitabiriye bahawe umwanya batanga ibitekerezo bigamije guteza imbere imibere y'abaturage barokotse Jenoside yakorewe Abatutsi 1994  banabaza ibibazo bitandukanye, abayobozi babitangaho ibisubizo.