Uyu munsi tariki ya 18 Ukwakira 2024, kuri hotel Ibigabiro ishami rya Rutsiro habereye inama y'Ihuriro ry'Ubumwe n'Ubudaheranwa ku rwego rw'Akarere. Abitabiriye inama bakiriwe n'Umuyobozi w'Akarere Madamu Kayitesi Dative mu gihe umushyitsi Mukuru yari Hon. Sen. Nyiramirimo Odette.

Iyi nama yateranye mu gihe abanyarwanda bazirikana ukwezi kwahariwe ubumwe n'ubudaheranwa by'abanyarwanda. Inama yibanze ku nsanganyamatsiko igira iti: "Indangagaciro na Kirazira: Isooko y'Ubumwe n'Ubudaheranwa by'Abanyarwanda."

Iyi nama iterana rimwe mu mwaka ifite intego zitandukanye zigamije kuguteza imbere ubumwe n'ubudaheranwa aho Abayobozi bibutswako bafite uruhare rukomeye mu gufasha abaturage kubakira ku ndangagaciro na kirazira mu buzima bwabo bwa buri munsi.

Hon. Nyiramirimo yagize ati: “… ni ngombwa rero gusubiza amaso inyuma, tukareba ibyafashaga Abanyarwanda kudatatira Igihango cy’Ubunyarwanda, tugakomeza kubyubakiraho no muri iki gihe. Ubumwe bw’Abanyarwanda ni ubuzima bwa buri munsi bw’Igihugu.”

Abitabiriye inama bagaragarijwe ko mu Banyarwanda hakiri ibibangamiye ubumwe bw’Abanyarwanda abanyarwanda basabwa guhangana na byo buri munsi kuko hari abagihembera ingengabitekerezo ya Jenoside. Hari kandi abagize uruhare muri Jenoside bataratera intambwe ngo basabe imbabazi abo bakoreye ibyaha; hari abakibona mu ndorerwamo y’amoko; ibikomere bikomoka ku mateka mabi Igihugu cyacu cyanyuzemo, n’ibindi.

Ibiganiro mu Ihuriro ry’Ubumwe n’Ubudaheranwa, akaba ari umwanya wo gusasa inzobe, kwisuzuma, kureba aho abanyarwanda bavuye n’aho bageze, gusuzuma ibikibangamiye Ubumwe n’Ubudaheranwa bikigaragara mu karere, aho abantu batuye, aho bakorera,  maze bagafatira hamwe  ingamba zo guhangana na byo.