Uyu munsi tariki ya 12 Kanama 2025, kuri Hotel Ubumwe, habereye inama yateguwe n'Umushinga Zero Out Of School igamije  gusuzumira hamwe uburyo abana bose bagana ishuri kandi bakarigumamo.

Inama iyobowe n'Umuyobozi w'Akarere Wungirije Ushinzwe imibereho myiza y'abaturage Madamu Umuganwa Marie Chantal ari kumwe n'Umuyobozi w'Umushinga Bwana Ndahayo Paulin. Inama yitabiriwe ibyiciro binyuranye bifite uruhare mu kugarura abana mu ishuri harimo abanyamabanga nshingwabikorwa b'imirenge, abagenzuzi b'uburezi mu mirenge b'imirenge save the children ikoreramo, abacungamutungo n'abayobozi b'ibigo bikorana n'Umushinga Zero Out Of School Children.

Madamu Umuganwa Marie Chantal yashimiye Save the Children ku ruhare rukomeye igira mu kubaka igihugu bahereye ku burezi bw'abana asaba abitabiriye bose n'abandi muri rusange gufasha ko abana bose bagana ishuri kandi bakarigumamo.

Umuyobozi w'Umushinga, Ndahayo Paulin, yibukije agaciro k'uburezi aho bifasha kwihutisha iterambere ry'umuntu ku giti cye, umuryango n'Igihugu muri rusange. Yagize: "uwo uhaye uburezi, ntacyo uba utamuhaye. Ni ngombwa rero ko duharanira ko abana bose biga bakazifasha kwibeshaho batabereye umuzigo Igihugu."

Umushinga Zero Out Of School Children ushyirwa mu bikorwa na Save the Children ufite  intego nyamukuru y'uko abana bose bagira amahirwe yo kugana ishuri no kurigumamo.

Uyu mushinga hari ibyo ugihura na byo nk'imbogamizi harimo:

1. Kuba abana bose bataragaruka mu ishuri bitewe n'ibibazo bitandukanye
2. Ibikorwaremezo bidaha amahirwe yo kwiga abana bose nk'abafite ubumuga
3. Ababyeyi badaha agaciro kwiga bakumva ko atari ngombwa kujyana abana ku ishuri
4. Imikoranire itaranoga neza hagati y'ibigo by'amashuri n'urubyiruko rw'abakorerabushake

Muri iyi nama hagaragajwe kandi ibiteganyijwe gukorwa n'uyu mushinga harimo gutanga ibikoresho bitandukanye ku bana batishoboye, gufasha abana batishoboye kubona amafunguro, gutanga inyunganirangingo  ku bana bafite ubumuga n'ibindi.

Abitabiriye inama kandi bagarutse ku mpamvu zituma abana bata ishuri aho muri ababyeyi n'abanyeshuri bagaragaje nko kubura ibikoresho by'ishuri, amakimbirane yo mu muryango, gusibira mu ishuri, ubushobozi buke bw'umuryango n'ibindi.

Inzego z'ibanze zikaba zasabwe kugira uruhare mu gukurikirana abana bataye ishuri bakarigarukamo.

Kugeza ubu, mu Karere habarurwa abana 641 bafite ibibazo by'ubumuga byihariye bikeneye ubufasha budasanzwe.